लिम्बुवानपाखें अनसन च्वनेगु ख्याच्वः
येँ (सन्ध्या टाइम्स)/राज्य पुनर्संरचना आयोगय् थःपिनि संगठनया प्रतिनिधि नं दुथ्याकेमाःगु माग यानाः म्हिगःनिसें अरुण पूर्वया गुंगू जिल्ला आम हडताल याःपिं लिम्बुवानतय्सं थनिंनिसें सतकय् कुहां वयाः प्रदर्शन नं याःगु दु। इमिसं थःपिनि माग पूरा मजुल धाःसा अनसन च्वनेगु ख्याच्वः तकं बिउगु दु ।
सञ्जुहाङ पालुङवाया नेतृत्वय् दुगु संघीय लिम्बुवान राज्य परिषद्या आह्वानय् थ्व लिम्बुवान आन्दोलनय् कुहां वयाच्वंगु खः। अनिश्चितकालीन आमहड्ताल आह्वान याःगुलिं थौं नं अनया जनजीवन प्रभावित जूगु दु ।
परिषदं आमहड्ताल आह्वान याःगुलिं सुनसरी, मोरंग, झापा, धनकुटा, संखुवासभा, ताप्लेजुङ, पाँचथर, इलाम लगायतया जिल्लाय् थौं सुथंनिसें हे सवारी साधन ठप्प जूगु दुसा बजाः व उद्योग नं ठप्प जूगु दु ।
नेपाल सरकार व परिषद्या दथुइ जूगु ५ बुँदाया सहमति कथं राज्य पुनर्संरचना आयोगय् परिषद्या प्रतिनिधि दुमथ्याकूगुलिं उकिया लागिं दबाव बीत थ्व आमहडतालया आह्वान यानागु खँ परिषदं धाःगु दु ।
२०६४ सालया चैत्रय् तत्कालीन शान्तिमन्त्री रामचन्द्र पौडेल व परिषद्या दथुइ जूगु न्यागू बुँदे सहमतिया स्वंगूगु बुँदाय् राज्य पुनर्संरचना आयोग गठन यायेगु इलय् परिषद्या नं प्रतिनिधि उकी दुथ्याकेगु धकाः सहमति जूगु खःसा आः उकियात कार्यान्वयन यायेमाः धइगु माग यासें आम हडतालय् कुहां वःगु खः ।
