जातजातिया तथ्यांक दछि लिपा जक
येँ (सन्ध्या टाइम्स)/थुगुसी काःगु राष्ट्रिय जनगणनाया पूवंगु ल्याः पिहां वयेत अझ मेगु दछि ति ई काइतिनिगु खँ धाःगु दु। देय्न्यंकं कया हःगु जनगणना तथ्यांकया फाइल फुक्कं थौंकन्हय् तथ्यांक विभागया गोदामय् तया तःगु दु। उगु गणना फारामयात आः कम्प्युटरय् तयाः प्रोसेसिङ्ग याये मानि। तर अर्थ मन्त्रालयं थुकिया लागिं ध्यबा निकासी मयाःगुलिं प्रोसेसिङ्गया ज्या थानाच्वंगु खः ।
तथ्यांक विभाग सूत्रं बिउगु जानकारी कथं आः मन्त्रालयं ध्यबा निकासी यायेगु बचं बीधुंकूगु दु। उकिं प्रोसेसिङ्गया लागिं टेण्डर प्रक्रिया नं सुरु जुइधुंकूगु दु। न्हापांगु चरणया टेण्डर क्वचायाः आः थौंकन्हय्पाखे हे निक्वःगु चरणया टेण्डर आह्वान यायेगु तयारी जुयाच्वंगु दु। थ्व ज्या यायेगु लागिं करिब १२ करोड तका मालीगु अनुमान केन्द्रीय तथ्यांक विभागं यानातःगु दु ।
यदि टेण्डर आह्वान यानाः ठेकेदार चयन यायेधुंकल धाःसा वयां लत्या लिपा ज्या सुरु याइ। ज्या पूवंकेत करिब च्याला ति ई काइ। तथ्यांक विभागया तथ्यांक अधिकृत एवं विश्लेषक ज्ञानेन्द्र वज्राचार्यं कनादी कथं थ्व प्रोशेसिङ्ग प्रक्रियापाखें देय्न्यंकंया जातजाति, भाषा व धर्मया ल्याः नं पिहां वइ। च्याला तक लगातार ज्या हे याये मालीगु जूगुलिं जातजातिया ल्याः पिकायेत मेगु दछि ति ई मालीगु खनेदु। वयां नं मेमेगु विवरण सहितया पूर्ण तथ्यांक पिकायेत ला मेगु निदँ स्वदँ हे मालीगु खनेदु ।
तथ्यांकया प्रोसेसिङ्ग ज्या लिबाः वंगुलिं छाय् लिबात थें सीकेत आदिवासी जनजाति ख्यःया मनूतय्सं अतिकं रुची तयाः विभागय् न्यनेकने याः वयाच्वंगु खँ नं विभागया सूत्रं धाःगु दु ।
