कांग्रेसया राज्य पुनर्संरचना नगरकोटय्
येँ (सन्ध्या टाइम्स)/राज्य पुनर्संरचना, शासकीय स्वरुप व निर्वाचन प्रणालीया विषयय् पार्टीया आधिकारिक धारणा दयेकेगु नितिं नेपाली कांग्रेस व विज्ञतय् बैठक थौं ख्वपया नगरकोटस्थित छगू होटलय् च्वंगु दु ।
थौं सुथंनिसें न्ह्यानाच्वंगु उगु बैठकय् संविधासभाया थीथी समितिपाखें तयार याःगु विवादित विषययात कयाः थःपिनि धारणा तयार याइ धाःगु दु। कांग्रेस संसदीय दलया प्रवक्ता नविन्द्रराज जोशीं जटिल विषययात कयाः सहलह यायेत्यनागु जुयाः पार्टी सभापति सुशील कोइराला, महामन्त्री कृष्ण सिटौला व कोषाध्यक्ष चित्रलेखा यादवयात नं बैठकय् सःतागु जानकारी बियादीगु दु। दलतय्गु दथुइ प्रधानमन्त्री व राष्ट्रपतिया अधिकार बारे नं विवाद ब्वलनाच्वंगु दुसा कांग्रेसं कार्यकारी प्रधानमन्त्रीया प्रस्ताव तया वयाच्वंगु दु। अथे हे कांग्रेस राज्य पुनर्संरचनाया सवालय् १४ प्रदेशया प्रस्तावयात नं अस्वीकार याना वयाच्वंगु दु ।
