इसासया लय्ताःपौ इनेज्या
येँ (सन्ध्या टाइम्स)/वंगु मोहनिया एकादशि कुन्हु जूगु झिंछक्वःगु साहित्य सम्मेलन व सांस्कृतिक ज्याझ्वःयात आर्थिक व भौतिक ग्वाहालि याःपिं महानुभावतय्त लय्तापौ इनेज्या व सांस्कृतिक ज्याझ्वः शनिवाः झःझः धायेक क्वचाल। मूपाहां कथं एनेकपा (माओवादी) या सभासद सत्यलाल मूल झाःगु उगु ज्याझ्वलय् एनेकपा (माओवादी) या केन्द्रीय दुजःत डी.आर. पोखरेल, प्रल्हाद पराजुली, दावा लामा, केशव खतिवडा, जीवन गौतम, एनेकपा (माओवादी) पार्टी ख्वपया इन्चार्ज भाष्कर प्रधानाङ्ग, सहइन्चार्ज सुरेश न्यौपाने, सभासद उमा कपाली, ख्वप ६ या इन्चार्ज ज्ञानेन्द्रमान श्रेष्ठ, ५ या इन्चार्ज सुनिल बासु आदिंपिसं थःथःगु बिचाः तयादीगु खः ।
आर्थिक व भौतिक कथं ज्या ग्वाहालि याःपिं महानुभावतय्त लय्तापौ बिसें मूपाहां सत्यलाल मूलं धयादिल, "जनता सहभागी मजूगु छुं नं ज्या सफल जुइ मखु। उकिं जनता हे सर्वेसर्वा खः। जनताया आदेश सकसिनं पालना यायेमाः। साहित्यिक व सांस्कृतिक ज्याझ्वलं जनचेतना अभिवृद्धि याइ।" ईसासया संयोजक तुल्सीभक्त सुवालया सभापतित्वय् न्ह्याःगु उगु ज्याझ्वलय् जगतबहादुर खयरगोलीं लसकुस न्वचु अले दांभरि राम कुसीं आर्थिक ल्याःचाः न्ह्यब्वयादीगु खः ।
