राष्ट्रिय ज्ञानमाला सम्मेलनया व्यवस्थापकयात ग्वाहालि
यल (सन्ध्या टाइम्स)/पद्मावती महाविहार, नःबहाः टोल सुधार समितिया अर्धवार्षिक समारोह क्वचाःगु दु। ज्याझ्वलय् वइगु पौष १६,१७ व १८ गते जुइगु न्हय्क्वःगु राष्ट्रिय ज्ञानमाला सम्मेलनया ब्यवस्थापक नगरमण्डप श्री कीर्तिविहार किपूयात ३३,७८०।- तका ग्वाहालि कथं लःल्हाःगु खः ।
पुलांम्ह मन्त्री व समाजसेवी बुद्धिराज बज्राचार्यं स्वक्वः तक जंक्व धुंकूपिं जगत बहादुर शाक्य, जोगराज शाक्य व मय्जु अष्टमाया शाक्ययात दोसल्ला व हनापौ देछासें हनादीगु खः। थुकिया लिसें शैक्षिक सत्र २०६७ सालया एसएलसी ताःलाःपिं नःबहाःया झिम्ह विद्यार्थीपिंत नं हनापौ व लुमन्ति चिं देछायादीगु खः। ज्याझ्वलय् श्री बच्छ महाविहार ज्ञानमाला भजन खलः, पद्मावती ज्ञानमाला भजन संघ, हःखा ज्ञानमाला भजन संघ, यशोधर महाविहार ज्ञानमाला भजन खलः, प्रज्ञानन्द स्मृति ज्ञानमाला भजन खलः, समग्र ज्ञानमाला भजन खलः व नगरमण्डप श्रीकीर्ति विहार किपुलिं ज्ञानमाला भजन न्ह्यब्वःगु खः ।
समितिया छ्यांज्ये युवराज शाक्यं धर्म देशना व पुण्यानुमोदन यानादीगु उगु ज्याझ्वः समितिया नायः जुजुभाई शाक्यया सभापतित्वय् न्ह्याःगु खः ।
