लुम्बिनीइ वज्रयान महाविहार दयेकेत जग्गा
येँ (सन्ध्या टाइम्स)/बुद्ध जन्मभूमि लुम्बिनीइ नेपाःया मौलिक वास्तुशैली पिज्वयेक नेपाल वज्रयान महाविहार (नेपाली विहार) दयेकेया नितिं नेपाल परम्परागत बौद्ध धर्म संघपाखें जग्गा माग याना वयाच्वं कथं लुम्बिनी विकास कोषया निर्णय व नेपाल सरकारपाखें जग्गा बीत सहमति जूगु दु। वंगु वालय् छगू ज्याझ्वःया दथुइ थ्व सम्बन्धी सम्झौता जूगु खः। सम्झौता कथं नेपाल परम्परागत बौद्ध धर्म संघयात लुम्बिनी विकास गुरुयोजना अन्तर्गत पश्चिम विहार क्षेत्रयागु प्लट नम्बर २ डब्लुसी (८० ह् ८० मिटर) या जग्गा प्राप्त जूगु खः ।
सम्झौता पत्रय् ल्हाःचिं तसें लुम्बिनी विकास कोषया उपाध्यक्ष कर्म सांग्पों लुम्बिनीइ नेपाःया मौलिक वास्तुशैली क्यनीगु वज्रयानी विहार आः तक नं छगू हे मदुगुलिं थ्व विहार दयेकेत लुम्बिनी विकास कोषपाखें जग्गा बीत्यनागु खः धयादिल नापं थ्व विहार मेगु सिकं बिस्कं स्वरुपया विहार जूगुलिं याकनं हे दयेकेगु ज्या न्ह्याका क्वचायेकेत नं हःपाः बियादिल ।
सम्झौता पत्र लःल्हाना कासें नेपाल परम्परागत बौद्धधर्म संघया नायः डा. नरेशमान वज्राचार्यं लुम्बिनीइ नेपाल वज्रयान महाविहार (नेपाली विहार) दयेकेत लुम्बिनी विकास कोषपाखें जग्गा बिया बिउगुलिं विकास कोषयात सुभाय् देछानादिल। वय्कलं लुम्बिनीइ थीथी देशया विहार दयेकेधुंकूगु दु इपिं विहारपाखें थःथःगु देशया प्रतिनिधित्व यानाच्वंगु दु तर नेपालय् नेपाः देशया प्रतिनिधित्व याइगु नेपाःया थःगु हे पुलांगु बौद्ध वास्तुशैली क्यनीगु विहार मदुगुलिं थुगु विहार दयेकेत कुतः यानागु नापं थुगु विहार नेपाःया हे चिं कथं जूवनीगु जुयाः विहार दयेकेत सकल नेपाःमिपिंसं ग्वाहालि यायेमाःगु खँ नं धयादिल ।
सम्झौतापत्रय् लुम्बिनी विकास कोषपाखें कर्म सांग्पो व निमित्त प्रमुख ज्ञानिन राईपाखें ल्हाःचिं तयादीगु खःसा संघपाखें अध्यक्ष डा. नरेशमान वज्राचार्य व महासचिव माणिकरत्न शाक्य "मणीश" पाखें ल्हाःचिं तःगु खः। सम्झौता पत्र लःल्हायेगु ज्याझ्वः नेपाल परम्परागत बौद्ध धर्म संघया दुजःपिं अथेहे नेपाल वज्रयान महाविहार निर्माण मूल समितिया दुजःपिनिगु उपस्थिति दुगु खः ।
