टोपबहादुरया बिचाः प्रति माओवादीया धापू छु?

पहिचानया लिधंसाय् संघीय व्यवस्था कायम जुइमाः धकाः सः थ्वयाच्वंगु इलय् लाक्क सत्तारुढ पार्टी एनेकपा (माओवादी) या पोलिटब्युरो दुजः समेत जुयादीम्ह छम्ह मन्त्री टोपबहादुर रायमाझीं जातीय म्हसीकाया आलोचना यासें नेवाः व तामाङया नामय् प्रदेश दयेके हे मजिउ धकाः सार्वजनिक अभिव्यक्ति समेत बियादीगु समाचार पिहां वःगु दु। देय्या फुक्कं जातियात स्वायत्त प्रदेश बीगु धइगु घोषित नीति न्ह्यःने तयाः संविधानसभाया चुनाव दकलय् अप्वः मत कायेत ताःलाःगु माओवादीया पोलिटब्युरो दुजःतय्सं आः वयाः जातीय पहिचानया लिधंसाय् राज्य बी फइ मखु धकाः न्ववायेगुया अर्थ छु खः? माओवादीया घोषित नीति ला जातीय म्हसीकाया लिधंसाय् हे स्वायत्त प्रदेश दयेकेगु खः। तर वहे पार्टीया छम्ह पोलिटब्युरो दुजलं उकिया अःखः न्ववाःगु दुसा उकियात कयाः माओवादीं स्पष्ट धारणा पित बी हे माः। उम्ह दुजलं माओवादीया आधिकारिक धारणाया अःखः न्ववाःगु खःसा वयात पार्टीं कारवाही यायेमाः। यदि कारवाही नं मयात व पार्टीं थःगु धापू नं पित मबिल धाःसा थ्व माओवादीयात नं स्वीकार्य दुगु हे बिचाः खः धकाः थुइकेत जनता बाध्य जुइ। जातीय म्हसीकाया लिधंसाय् स्वायत्त प्रदेश दयेके मबीगु लागिं माओवादी दुने नं चलखेल सुरु जुइधुंकल धइगु हुुइनाभुइना थ्व स्वयां नं वयाच्वंगु हे खः। प्रम डा. बाबुराम भट्टराईया गुलिखे अभिव्यक्ति न्हापा नं विवादय् वःगु खःसा थौंकन्हय् अध्यक्ष प्रचण्डं नं बिचाः हिलाच्वन धइगु द्वपं मवःगु मखु। आः वय्कःपिनि हे खेमाय् लाःम्ह छम्ह दुजलं थथे न्ववाना हःगुया अर्थ गनं माओवादी नेतातय्सं जनतायात झंगः लायेगु निर्णय हे यायेधुंकूगु जकं खःला?

More Stories Like this