नेवाः प्रदेशया लागिं बुद्धिजीवी

येँ(सन्ध्या टाइम्स)/नेवाः स्वायत्त राज्य व थौंया आवश्यकता विषयय् राजनैतिक दलया नेवाः नेता, सभासद, नेवाः प्राध्यापक व नेवाः कर्मचारीतय् दथुइ सहलह मुँज्या जुल। त्रिचन्द्र क्याम्पसया नेवाः स्यनामि व ज्याकःमि पुचःया नायः डा. गोपाल धौबन्जारया सभापतित्वय् जूगु उगु ज्याझ्वलय् थौंया मू विषय नेवाः स्वायत्त राज्य प्राप्त यायेगु खः गुकिया निंतिं सना जूपिं राजनैतिक नेतातय्त बुद्धिजीवी, प्राध्यापक, कर्मचारीतय्सं नं लिउने च्वनाः साथ बीमाः धइगु खँय् सहलह जूगु खः।
ज्याझ्वलय् न्ववासें माओवादीया सभासद हितमान शाक्यं पहिचानया राज्य वल धाःसा सामर्थ्य अथें वइ धयादिल। नेपालभाषा केन्द्रीय विभागया नायः प्रा. प्रेमशान्ति तुलाधरं नेवाःत न्हापा आदिवासी जनजातिया हक अधिकारया सः थ्वयेकाच्वंपिं खःसां नं थौंकन्हय् थुगु पुचलय् नेवाःत हे खने मदु धयादिल।
अथे हे नेकपा (एमाले) या केन्द्रीय दुजः राजेन्द्र श्रेष्ठं नेवाः राज्यया निंतिं सक्रिय जुयाच्वंपिं भाषासेवी व संस्कृति ह्यःमि जक जुयाच्वंगुलिं आः बुद्धिजीवीपिं नं राजनैतिक रुपं न्ह्यज्यायेमाःगु खँ कनादिल। कांग्रेस सभासद तीर्थराम डंगोलं सभासदतय्त बुद्धिजीवीपिं लिउने च्वनाः ग्वाकेगु ज्या यात धाःसा याकनं नेवाः स्वायत्त राज्य प्राप्त जुइगु सम्भावना दु धयादिल। राज्य पुनर्संरचना सुझाव आयोगया दुजः मल्ल के.सुन्दरं सहभागीपिंसं न्यंगु न्ह्यसःया लिसः बियादिसें नेवाः स्वायत्त राज्यया विषयय् बौद्धिक ख्यलय् दयाच्वंगु भ्रम चीकेमाःगु व नेवाः स्वायत्त राज्यया विरोधय् जुयाच्वंगु नकारात्म्क हल्लापाखें सचेत जुइ माःगु बिचाः प्वंकादिल।
ज्याझ्वलय् संघर्ष समितिया दुजः दिलबहादुर श्रेष्ठ नापं पब्लिक युथ कलेज, पद्मकन्या कलेज, पिपल्स कलेज, ललितकला कलेज, सरस्वती कलेजया प्राध्यापक व कर्मचारीपिनि नं उपस्थिति दुगु खः। ज्याझ्वलय् ग्वसाः खलःया दुजः तीर्थनारायण डंगोलं लसकुस यानादीगु खः।