ज्या जूसा २०१७ य् लोडशेडिङ म्हो जुइ !

येँ(सन्ध्या टाइम्स)/यदि आः दयेकेगु धकाः तयारी जुयाच्वंगु फुक्क हे जलविद्युत परियोजना दयेकेगु सुरु यात व दयेकू थें पाय्छि इलय् सिधल धाःसा नं सन् २०१७ तक चिकुलाया इलय् लोडशेडिङ कम जुयाः न्हिं ७ घण्टा जू वइगु खँ सीदुगु दु।
नेपाःया लोडशेडिङ गथे यानाः म्हो याये फइ धकाः नेपाल विद्युत प्राधिकरण दुने जुयाच्वंगु होम वर्कं थ्व निष्कर्ष पिकाःगु खः।
तर दुःखया खँ छु धायेबलय् नेपालय् दयेकेगु धकाः तयारी जुयाच्वंगु परियोजनात फुक्कं अझ नं दयेकेगु सुरु मजूनिसा गुलिखे तयार हे जुयाच्वने धुंकूगु परियोजना नं गबले दयेकीगु खः ठेगान मदुनि।
यदि आः पाइप लाइनय् लानाच्वंगु परियोजना दयेकू थें तयार जुया वन धाःसा सन् २०१४ निसें लोड शेडिङ छुं भचा कम यायेगु अवस्था वइ।
उर्जा मन्त्रालयया सचिव उमाकान्त पौडेलं लोड शेडिङया थ्व प्रक्षेपण सार्वजनिक यानादीगु खः। वय्कलं आशा यानादी थें तयारी अवस्थाय् लानाच्वंगु फुक्कं परियोजना आः हे दयेकीगु अवस्था मदुनिगु व दयेकूसां इलय् सिधइगु ग्यारेन्टी मदुगु कारणं यानाः देशय् जारी लोडशेडिङ मेगु झिदँ स्वयां अप्वः तक कायम हे जुयाच्वनीगु विश्लेषण जलविज्ञतय्सं यानाहःगु दु। चिकुलाय् भारतया विद्युत न्यायेगु धकाः तयारी जूसां प्रशारण लाइन मदुगुलिं थ्व नं सम्भव मजुयाच्वंगु दु।