माओवादी नेतापाखें जातीय राज्यया विरोध

येँ(सन्ध्या टाइम्स)/माओवादी स्थायी समितिया दुजः नापं स्थानीय विकासमन्त्री तोपबहादुर रायमाझीं नेवाः प्रदेश व तामाङ प्रदेशया खुल्ला विरोध यानादीगु दु। वंगु विहिवाः विश्व मानवअधिकार दिवसया लसताय् राष्ट्रिय मानवअधिकार सरोकार केन्द्रं ग्वसाः ग्वःगु छगू ज्याझ्वलय् न्ववासें मन्त्री रायमाझीं जातिया आधारय् गुगुं नं हालतय् राज्यया पुनर्संरचना याये मजिउ, संविधानसभाया राज्य पुनर्संरचना नापं राज्यशक्ति बाँडफाँट समितिपाखें तयार याःगु १४ प्रदेश मध्ये ७ प्रदेश जातीय आधारय् दयेकातःगु दु उकिं उकिया विरोध यायेमाः नं धयादिल।
वय्कलं नेवाः प्रदेश व तामाङ प्रदेश जुल धाःसा नेवाःतय्सं बनेपाय् व तामाङतय्सं एयरपोर्टय् ध्वाँय् ब्वयेकः वइ अले नेवाः व तामाङ दथुइ तःधंगु ल्वापु जुइगु दावी नं यानादिल। वय्कलं धयादिल, 'संचारकर्मीतय्सं जितः छिगु पहिचान छु धकाः न्यनीबलय् जिं ला लं सुरुवाः खः धायेगु यानाच्वनागु दु।'
जातीय आधारय् राज्यया पुनर्संरचना यायेमाः धइगु बिचाः दुगु पार्टी माओवादी दुनेया लाइन संघर्षय् मन्त्री रायमाझीं प्रधानमन्त्री लिसें उपाध्यक्ष डा. बाबुराम भट्टराईयात समर्थन यानादीगु खः। वय्कःया थ्व 'न्हूगु बिचाः' न्यनाः माओवादीया नेवाः व तामाङ कार्यकर्तात चकित जुसें थ्व मामिलाय् पार्टीया धाथेंया बिचाः छु धकाः समेत न्ह्यसः तयाहःगु दु।