आयोगय् लिम्बु दुजःया माग

लिम्बु दुजः मतःगुलिं थनिंनिसें लिम्बुवान बन्द
येँ(सन्ध्या टाइम्स)/राज्य पुनर्संरचना आयोगय् थःपिनिगु संगठनया नं प्रतिनिधि दुथ्याकेमाः धइगु माग यासें सञ्जुहाङ पालुङवाया नेतृत्वय् दुगु संघीय लिम्बुवान राज्य परिषदं थनिंनिसं लिम्बुवान लागा बन्द याःगु दु।
उगु संगठनं थनिंनिसें अरुण खुसिया पूर्वय् लाःगु गुंगू जिल्ला अनिश्चितकाल तकया लागिं बन्द याःगु खः। बन्दं यानाः थनिंनिसें हे अनया जनजीवन प्रभावित जुइधुंकूगु दु।
परिषदं आमहड्ताल आह्वान याःगुलिं पूर्वया सुनसरी, मोरंग, झापा, धनकुटा, संखुवासभा, ताप्लेजुङ, पाँचथर, इलाम जिल्लाय् थौं सुथंनिसें हे सवारी साधन ठप्प जूगु दुसा बजाः व उद्योग व्यवसाय नं ठप्प जूगु दु। विद्यार्थीतय् परिक्षा जुयाच्वंगुलिं उज्वःगु स्कूल व स्कूलया बस बाहेक मेगु फुक्कं शैक्षिक संस्था नं ठप्प जूगु दु।
नेपाल सरकार व परिषद् दथुइ जूगु ५ बुँदाया सहमतिइ राज्य पुनर्संरचना आयोगय् परिषद्या प्रतिनिधि नं दुथ्याकेगु खँ दुसां सरकारं उमि प्रतिनिधि दुमथ्याकूगुलिं कारणं दबाव बीत आमहडताल यानागु खँ परिषदया जिल्ला नायः भुपेन्द्र सुन्दर लावतीं धयादीगु दु।
२०६४ चैत्र महिनाय् तत्कालीन शान्तिमन्त्री रामचन्द्र पौडेल व परिषद् दथुइ जूगु न्यागू बुँदाया सहमतिइ स्वंगूगु बुँदाय् राज्य पुनर्संरचना आयोग गठन यायेगु इलय् परिषद्या नं प्रतिनिधि दुथ्याकेगु सहमति जूगु खः। राज्य पुनर्संरचना आयोगय् संघीय लिम्बुवान राज्य परिषद्या प्रतिनिधित्व जुइमाःगु व लिम्बुवानया ऐतिहासिक पृष्ठभूमि, भौगोलिक क्षेत्र लगायतया आधारय् स्वायत्त राज्यतय्गु संवैधानिक व्यवस्था यायेमाःगु माग यानाः थःपिंसं आम हड्तालया आह्वान यानागु खँ संघीय लिम्बुवान राज्य परिषद्या अध्यक्ष सञ्जुहाङ पालुङं संचारकर्मीतय्त कनादीगु दु।
नायःयाके स्पष्टीकरण
राज्य पुनर्संरचना आयोगया न्हूम्ह संयोजक डा. मदन परियारं न्ववानादीगु खँयात कयाः सरकारं वय्कःयाके स्पष्टीकरण कायेगु खँ सञ्चारमन्त्री जयप्रकाश गुप्तां धयादीगु दु। राज्य पुनर्संरचना यायेबलय् फुक्कं प्रदेशयात उत्तर-दक्षिण स्वाकाः निर्माण यायेमाः धकाः बिचाः तयादीगुलिं वय्कःयाके स्पष्टीकरण कायेगु खँ धाःगु खः। वय्कःयात राज्य पुनर्संरचना उकथं यायेगु म्यान्डेट मदुगु खँ नं मन्त्री गुप्तां धयादिल।