च्याक्वःगु ज्यापु दिवस हन

च्याक्वःगु राष्ट्रिय ज्यापु दिवस संचवाः ज्यापु समुदायं थीथी सांस्कृतिक झाँकी सहितया र्‍याली व सभा यानाः हन । सभामुख सुभाषचन्द्र नेम्वाङया मू पाहाँसुइ बसन्तपुलि जूगु सभाय् थीथी व्यक्तितय्त सम्मान नं यात ।

ज्याझ्वलय् मू पाहाँ नेम्वाङं नेवाः समुदायया संस्कृति हे राष्ट्रिय संस्कृति जूगु धयादिसें आः न्हूगु नेपाः सिर्जना यायेगु ज्याय् नं नेवाः समुदाय व उकी नं विशेष रुपं ज्यापु समुदायं पहल यायेमाःगु धयादिल । ज्यापु संस्कृति विकास कोषया नायः चक्रमान डंगोलया सभापतित्वय् जूगु समारोहय् महेन्द्रराज डंगोलं ज्याझ्वःया उद्देश्यया ध्वाथुइकादीगु खः ।

ज्याझ्वलय् मू पाहाँ नेम्वाङं ज्यापु सेवा पदक, ज्यापु शिक्षा पदक, ज्यापु विशेष सम्मानपाखें नेवाः समुदायया अग्रजतय्त सम्मान यानादीगु खः । वय्कलं परम्परगत पायो जात्राय् मू धामि जुयाः ग्वाहालि यानाच्वनादीपिं लक्ष्मीनारायण महर्जन, बुद्धिनारायण महर्जन, जगनारायण महर्जन, रामकृष्ण महर्जन, बेखानारायण महर्जन, ईश्वरमानसिं व लक्ष्मीनारायण महर्जनयात ज्यापु सेवा पदक लःल्हानादीगु खः ।

अथेहे थुगु दँया ज्यापु रत्न उपाधिपाखें रत्नमान डंगोलयात सम्मान यानादिलसाः ज्यापु प्राज्ञया उपाधि मल्ल के. सुन्दरयात, ज्यापु प्रतिभा निकेश डंगोल, फोटो पत्रकार राजभाई सुवाल, कासाःमि संगीता डंगोल व शिक्षा पदक विद्यादेवी डंगोलयात लःल्हाःगु खः । उगु सम्मानपौ नापं झिद्वः तक नं फुक्कसितं लःल्हाःगु खः ।

ज्याझ्वलय् ज्यापु विशेष सम्मानपाखें राज्यमन्त्री दिलीप महर्जन, त्रिभुवन विश्वविद्यालयया उपकूलपति डा. हिराबहादुर महर्जन, सगरमाथा आरोही सन्तकुमार महर्जन, दाता अष्टमान महर्जन, समाजसेवी मानसिं महर्जन, शिक्षक मानदास महर्जन, इन्जिनियर इन्द्रमानसिं व हरिकुमार श्रेष्ठ सम्मानित जुयादीगु खः ।

समारोह स्वयां न्ह्यः येँया थँबहिलिं छगू भव्य र्‍याली सुरु जुयाः बसन्तपुलि थ्यंकाः सभाय् हिउगु खः ।

More Stories Like this