जगजित सिंह

सुनिता जुनु

पलखया नितिं गतिमान ई न स्थिर जुयाबिल,
न्ह्यानाच्वंगु खुसी न सुम्क दिनाबिल,
चलायमान फय् न त्यानुया झासु लँनाबिला,
त:गुँया तफा:गु छाती न केकुनाबिल,
च्वापु गुँ न ख्युँउसे च्वनाबिल,
झ्वाला न अन हे दिनाबिल,

थौं सारा संसार स्तब्ध, निशब्द्ध, दक्वं झ्वाता, वाताहाँ सकसियां नुग: ख्व:, वयागु सास: दिगुलिं संसारसिया न छक्व सास: दित । नुग: हे ख्वाउँल, मिखा ललमल धाल, छ्यँ झ्यातुल। कपा ज्वना, उफ्!

ख: नां जगजित। यानिकि संसारया जीत । थ:गु नां देया नितिं त्वता थकेफुम्ह, लोकंह्वाम्ह, गजल हालामि जगजित। थौं १० अक्टुबर, २०११ य् जीवनया ७० बसन्त पार यानां ब्रेन ह्यामरेज जुया मन्त ।

८ फ्रेव्रुवरी ई सं १९४१ य् श्री गंगानगर, इण्डियाय् बुम्ह, नागरिक ख:सां तबि नं वयकयात म्ह मस्युपिं थ्व साउथ इस्ट एसियाय् म्हो जक दइ । अझं धायेगु हे ख:सा वयकया स: संसारया बच्छि मनूतय्सं न्यंगु दइ । जगजित या मचाबलय् या नां जगमोहन ख: , लिपा वया गुरुं मोहन लिकानां ‘जगजित’ धका: तया ब्यूगु जुल। म्ये रेकर्डिङ यायेगु झ्वलय् जगजितंचित्रा दत्ता नापं नापलात।

निदँलिपा सन् १९७०य् उमिगु ब्या जुल। सन् १९७५ मा एच्.एम्. भी. या:गु हे ईच्छाय् जगजित दम्पतिं अन्फर्गेटेबल अल्बम पिकाःगु ख:।

मचांनिसें हे शास्त्रीय संगितया ज्ञान दुम्ह, सन् १९६५ य् संगीतकार जुइगु म्हंगस ज्वना मुम्बई वल। चलचित्र 'साथ साथ' य् वं संगीत त:गु ख:। 'बात निकलेगी हरबातमे' धा:गु म्ये वयागु संगीतय् जूगुलिं भुपेन्द्रं महा:, वं हे हाल, गुगु म्ये तसकं लोकं न ह्वात। जीवनया संघर्षया इलय् वं बिज्ञापनया जिंगल व ब्याया ज्याझ्वलय् नं म्ये हाला जुल। सन् १९८१ य् पिहाँव:गु 'प्रेमगीत' धा:गु फिल्मया म्ये-

"होठोंसे छुलो तुम, मेरा गीत अमर करदो
बन जाओ मीत मेरे, मेरी प्रित अमर करदो"

थ्व म्ये नं वयात धात्थें हे अमर याना बिल। अन लिपाया फिल्म 'अर्थ' सन् १९८२ य् पिहाँवल,
उकी हा:गु म्ये
'तुम इतना जो मुस्कुरा रहि हो
क्या गम है जिसको छुपा रहि हो'
न तसकं हे लोकंह्वात। उर्दु भाषा मथुपिन्सं नं, वं हालात:गु गजल म्ये फुक्वं अपुइक हे थु । “माँ सुनाओ मुझे वो कहानी”, “वो कागज कि कस्ती वो बारिसकी पानी”, “तुमको देखा तो ये खयाल आया”, “अपनी मर्जी से कहाँ अपने सफर के हम हैं”, थज्या:गु यक्व लोकंह्वा:गु गजलत हाला: गजल दुनियाय् छगू न्हूगु आयाम तनेत सफलम्ह ब्यक्तित्व ख:। उर्दु, हिन्दी, पञ्जाबी याना: न्यागु दर्जन एल्बम पिथनेत ता: लात, नापं नेपाली संगीतकार आलोकश्रीया संगीतय् "संयोग" धा:गु नेपाली गजल हा:गु दु, मुक्कं च्यापु गजल दुगु व एल्बमय् छपु 'कुन माया सदर भो' धा:गु गजलया म्यूजिक भिडियोलय् नेपा:याम्ह नांजाम्ह नाय: राजेश हमालं मोडल जुयाच्वना ब्यूगुलिं वयात तसकं हे गर्व ताल। “ संयोग” एल्बम वयागु दक्वसिबें न्हापांगु व दक्वसिबें लिपांगु नेपाली एल्बम ख:।

सन् १९७० निसें सन् १९८० तक जगजित-चित्राया तिपु जीवन थें तुं गजल संगीतया दुनियाय् निम्हेसियागु एकछत्र राज जुया च्वन। ई न्ह्याबलें छगु हे जुया च्वनिमखु धइथें, उमिगु न्ह्यैपुसे च्वंगु जीवनय् नं खिमिलां थिल। सन् १९९० य् उमिगु याक काय् विवेक झिन्च्यादँ दुबलय् कार दुर्घट्नाय् लाना मन्त। सन् २००३य् वयात भारतीय सरकारं पद्मभुषणं सम्मानित यात। अथे हे सन् २००९ य् उमिगु हे धर्मपुत्री न आत्माहत्या यात। आ: उमिगु परिवारय् चित्रा याकचा जुल। चित्रा नापनापं सारा संसार न याकःचा जुल।

ज्व: मदुगु स:, गुलि न्यंन उलि हे झं न्यने न्यने मास्ति वइगु, झुमि यंकुथें । "हे राम" थ्व निग: खँग्वलं आधा घण्टा थ:गु सलय् न्यनामिपिन्त भुलेयाना तयेफुगु हे वयागु तधंगु सफलता ख: । थ्व जक मखु, छक्व नेपालय् बि. आइ. सि.सि. भवनय् वयकया लाइभ कन्सर्ट जूबलय् नं यक्व हिन्दी गजलत हा:गु ख: । उबले नेपा:गालय् च्वंगु पशुपतिनाथयात लुमंका हा:गु "ॐ" धा:गु गजलं जित नं थिल। व हे छग: खँग्वलं थन नं आधा घण्टा हाल । थी थी राग व तालय्, थुलि झुमि यंकल कि जिंला व म्ये सिध:गु हे मचा:। अज्याम्ह प्रतिभा व इण्डियाया जक शान मखु, थ्व सारा जगतया शान्, मान ख:। उकिंला नां जगजितअलय् ज्यां नं । धन्य वयागु मन, वयागु आत्माया चिर शान्तिया कामना । ॐ शान्ति… ॐ शान्ति… ॐ शान्ति

More Stories Like this