माधव नेपालं सुविधा लित बिल
येँ (सन्ध्या टाइम्स)/पुलांम्ह प्रधानमन्त्री नापं एमालेया वरिष्ठ नेता माधव नेपालं सर्वोच्च अदालतं म्हिगः याःगु फैसलायात स्वीकार यासें थम्हं पुलांम्ह प्रधानमन्त्रीया हैसियतं कयातःगु सुविधा लित बियादीगु दु ।
थौं हे वय्कलं थःगु सुविधाया गाडी, पछुवा गाडी नापं सुरक्षाकर्मी तकं लित बियादीगु दु। थौं सुथय् मुख्य सचिव माधवप्रसाद घिमिरेयात टेलिफोन यानाः वय्कलं थःत बियातःगु सरकारी सुविधाया गाडी व सुरक्षाकर्मी लित यंकेत इनाप यानादीगु खः। थौं सुथय् गोठाटारय् जूगु मदन-आश्रित स्मृति भवनया उलेज्याय् वय्कः सुविधां प्राप्त जूगु छुं नं साधन मज्वँसे झाःगु खः। थ्व सुविधा लित बियाः वय्कः सर्वोच्चं याःगु फैसला पालना यानादीम्ह न्हापांम्ह विशिष्ट व्यक्ति जुयादीगु दु। वय्कलं थुपिं बाहेक घरभाडा आदि सुविधा धाःसा कयातःगु मदु ।
वय्कःया प्रेस सहयोगी बिष्णु रिजालं थन छगू प्रेस नोट पिकासें थुकिया जानकारी बियादीगु खः। उखे एमाले अध्यक्ष झलनाथ खनालं नं सुविधाया गाडीत लित बी फइगु खँ वय्कःया प्रेस सहयोगी सूर्य थापां कनादीगु दु ।
सर्वोच्च अदालतया न्यायाधीशपिं अवधेशकुमार झा व भरतराज उप्रेतिया इजलासं म्हिगः पुलांपिं प्रधानमन्त्री, उपप्रधानमन्त्री, गृहमन्त्री व पुलांपिं राजपरिवारया दुजःपिंत बियातःगु सरकारी सुविधा कानूनसम्मत मजू धासें म्हिगःया मितिंनिसें हे खारेज यायेत आदेश बिउगु खः। लिसें सरकारं थ्व सुविधा लित काः मकाः अनुगमन यायेत अख्तियार दुरुपयोग अनुसन्धान आयोग व महालेखा परीक्षकयात नं आदेश बिउगु खः। नेता नेपालया थ्व पलाखं सुविधा कयातःपिं मेपिं नेतातय्त नं दवाव जूवंगु दु ।
