हानं सत्ता समीकरणय् हे देय्या राजनीति

थीथी शिविरय् तयातःपिं माओवादी लडाकुया पुनर्वर्गीकरणया ज्या क्वचाये धुंकाः वयां लिपा यायेमाःगु ज्या धाःसा हानं थाति तुं लाः वंगु दु। पुनर्वर्गीकरण ज्याय् सेना समायोजनय् वनीपिनि ल्याः अप्वःगु, स्वेच्छिक अवकास काइपिंत बिदाइ बिया छ्वयेमाःगु आदि ज्या न्ह्याके त्ययेकाः विशेष समितिया बैठक तकं च्वने मफुगुलिं प्रक्रिया दिउवंगु खः। थ्व ज्या दिउवंगुया लिउने देशय् हानं सुरु जूगु सत्ता समीकरणं मू भूमिका म्हितूगु मदु धाये मछिं। दलतय् दथुइ जूगु ७ बुँदाया सहमति कथं गठन यायेमाःगु राष्ट्रिय सरकारया नेतृत्व सुनां यायेगु धइगु विवाद पिहां वयेवं याउँक न्ह्यानाच्वंगु शान्ति प्रक्रियाय् पंगः पिदंगु खः। वर्तमान प्रधानमन्त्री डा. बाबुराम भट्टराईं आः राष्ट्रिय सरकारया नेतृत्व नं थम्हं हे यायेगु 'भद्र सम्झौता' जूगु दु धकाः न्ववायेवं उज्वःगु सरकारया दावी याना वयाच्वंगु मेगु दलतय्सं वय्कःयात �फय्गं� या संज्ञा बिउगु दु। स्वयम् माओवादी पार्टी दुने हे नं राष्ट्रिय सरकारया नेतृत्व सुयात याके माली धकाः अध्यक्ष प्रचण्डं �चिन्तन� सुरु याःगु खँ पिहां वःगु दुसा नेपाली कांग्रेस दुने राष्ट्रिय सरकारया नेतृत्व यायेगु धकाः शेरबहादुर देउवा व रामचन्द्र पौडेल दथुइ घोराघोर तकं सुरु जुइ धुंकूगु दु। उखे आः नकतिनि हे एमाले दुने नं भावी सरकारयात समेत ध्यानय् तयाः अध्यक्ष झलनाथ खनालं पार्टी दुने न्हूगु समीकरण दयेकेगु कुतः याना हःगु समाचार पिहां वःगु दु। थ्व ल्याखं स्वयेबलय् आः देय्या सम्पूर्ण राजनीति हानं छक्वः सत्ता समीकरणया हे जःखः चाःहिलेगु सुरु जूगु स्पष्ट जू गुकिया लिच्वः कथं शान्ति प्रक्रियाया ज्याय् हानं दिपाः वया बिउगु दु।

More Stories Like this