राष्ट्रिय सरकारया नेतृत्व पौडेलं याइ: कोइराला
फुसा निर्णय उल्टे या: देउवा
येँ(सन्ध्या टाइम्स)/नेपाली कांग्रेसया सभापति सुशील कोइरालां आः गठन जुइगु राष्ट्रिय सहमतीय सरकारया नेतृत्व कांग्रेस संसदीय दलया नेता रामचन्द्र पौडेलं याइ धयादीगु दु।
शान्ति प्रक्रिया पूवनेवं हे दयेकीगु अज्याःगु सरकारया नेतृत्व पौडेलं याइ धासें वय्कलं वर्तमान प्रधानमन्त्री डा. बाबुराम भट्टराईयात राष्ट्रिय सहमतीय सरकारया नेतृत्व याके बीगु खँ जुइ मखु धकाः नं दावी यानादिल।
वय्कलं नेपाली कांग्रेस छगू प्रजातान्त्रिक पार्टी जूगु व थुकियात सिष्टमय् यंकेत्यनागु जूगुलिं पार्टी दुने विवाद पिहां वयाच्वंगु खः धयादिल। थौं सुथय् रामेछाप वनेगु झ्वलय् प्रेस युनियनं सिन्धुपाल्चोकय् याःगु पत्रकार भेटघाटय् न्ववासें थ्व खँ धयादीगु खः।
उखे कांग्रेस नेता शेरबहादुर देउवां सहमतीय सरकारया नेतृत्व थम्हं यायेगु जुइ धकाः पार्टीया केन्द्रीय समितिं हे निर्णय याना तयेधुंकूगुलिं फुसा थ्व निर्णय उल्टे यानाः क्यँ धकाः सभापति कोइरालायात हाथ्या बियादीगु दु। नेपाल प्रेस युनियन गुल्मीपाखें थौं सुथय् तम्घासय् याःगु पत्रकार सम्मेलनय् न्ववासें देउवां थःगु हे कुतलं पार्टी एकीकरण खः व आः नं पार्टीयात छप्पँ याना तयेत थः देश दौडाहलय् ब्वाँय् वनाच्वनागु खँ स्पष्ट यानादिल।
पार्टी सभापतिं सहमति मयासे न्ह्याः वनेत स्वल धाःसा थम्हं ल्हाः तुति ज्वने फइ मखु धासें सभापतिया व्यवहार स्वयाः जक थः न्ह्याः वनेगु जुइ धकाः नं वय्कलं धयादिल। विघटन जुइधुंकूगु भातृ संगठनतय्गु लागिं मंसिर अन्तिम तकया दुने नां छ्वया हजि धकाः सभापति कोइरालां आह्वान याःगु बारे थःत छुं जानकारी मदुगु खँ नं देउवां धयादिल।
