ज्यापु जिथिपिंत हना
येँ(सन्ध्या टाइम्स)/च्याक्वःगु ज्यापु दिवसया लसताय् मंगलवाः जूगु छगू ज्याझ्वःया दथुइ ज्यापु जिथिपिंत हनेगु ज्या जुल। झी ज्यापु मिसा पुचःया ग्वसालय् जूगु उगु ज्याझ्वलय् गुइदँनिसें सछिदँ दुपिं ७ म्ह ज्यापु जिथिपिंत हनेगु ज्या जूगु खः। येँया महाद्यःपार्वती दबुली जूगु उगु ज्याझ्वलय् मूपाहां कथं पर्यटन व नागरिक उड्डयन राज्यमन्त्री दिलीप महर्जन झाःगु खः।
उगु हे ज्याझ्वलय् त्रिविविया न्हूम्ह उपकूलपति हिराबहादुर महर्जन व पर्वतारोही सन्तकुमार महर्जनपिंत नं हनेगु ज्या जूगु खः। ग्वसाः खलःया नायः छोरी डंगोलया सभापतित्वय् न्ह्याःगु उगु ज्याझ्वलय् न्वकु सबिता महर्जनं लसकुस यानादीगु खः।
अथे हे थुगुसीया ज्यापु दिवसया प्रचार यायेत संयोजक त्वाः लःघःछेँपाखें मंगलवाः छगू सुकुन्दा र्याली नं न्ह्याकूगु दु। लःघः त्वालं न्ह्याःगु उगु सुकुन्दा र्यालीं येँया थःने क्वःने लागा चाःहिउगु खः।
