छपा ल्हातं बियाः मेगु ल्हातं कायेगु नीति
भारतं नेपाःयात थः भिंम्ह पासा धकाः ला बरोबर धायेगु याः तर भिंम्ह पासालिसे याइगु व्यवहार धाःसा सुं धूर्त बनिया स्वयां कम मजू धइगु खँ हानं छक्वः पुष्टि जूगु दु। भारतीय लगानी सुरक्षाया ग्यारेन्टी जुइ कथं बिप्पा सम्झौता यायेगु लागिं भारतं नेपाःयात अतिरिक्त भन्सार महसुल व डीआरपी चीकेगु लोभ क्यंगु खः। थ्व निता चीकेगु खँय् सहमति यायेगु खःसा थःपिंसं नं बिप्पा सम्झौताय् हस्ताक्षर याये धकाः प्रधानमन्त्री डा. बाबुराम भट्टराईनं भारतय् ल्हाःचिं तया थकल। आः भारतं अतिरिक्त भन्सार महसुल व डीआरपी चीकेगु सहमति यायेत धाःसा नेपाःयात हानं मेगु छगू सहमतिइ हस्ताक्षर याकूगु दु गुकिं नेपाःया कृषि उत्पादनया व्यापार ध्वस्त जुइगु तःधंगु सम्भावना दु। भारतया कृषि उपजय् नेपालं कायेगु यानाच्वंगु कृषि सुधार शुल्क आवंलि मकायेगु न्हूगु सहमति नं नकतिनि जूगु दु। थुकिं यानाः नेपालय् भारतीय कृषि उपज दंक थ्यनीसा थुकिं यानाः नेपाःया कृषि उत्पादनं थःगु हे देशय् तकं बजाः काये फइ मखु। आः नकतिनि हे नं देशय् वाया उत्पादन न्हापा स्वयां अप्वल धाल तर वा मी त्ययेकाः धाःसा बजारय् वाया भाः कुहां वयाः किसानत मारय् लाःगु दु। देशय् वाया भाः कुहां वःगुया मू कारणं भारतं प्रशस्त मात्राय् वा दुहां वःगुलिं खः धाःगु दु। छुं छुट मबिउसां ला भारतीय उत्पादनं नेपाली उत्पादनया बजाः थथे स्यंकेफु धाःसा कन्हय् सुविधा सहित अज्याःगु उत्पादन दुहां वल धाःसा उकिं नेपाःया कृषि उद्योगयात गज्याःगु लिच्वः लाकी अथें अनुमान यायेफु। अर्थनीति जुइमा वा राजनीति, छुं मकायेकं छुं मबीगु भारतया बनिया नीति थुगुसी हानं छक्वः ताःलाःगु दु।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
