नेपालमण्डल पूरा हे ठप्प
बन्दया प्रतिकार याः वःपिं ज्वन
येँ / (सन्ध्या टाइम्स) न्हूगु संविधानय् नेवाः स्वायत्त राज्य नीस्वनेमाःगु व सरकारं हःगु काठमाडौं उपत्यका शहरी विकास विधेयक लित कायेमाःगु माग यासें नेवाः स्वायत्त राज्य मंकाः संघर्ष समितिया आह्वानय् थौं जूगु बन्द घोषणां नेपालमण्डल लागा पूर्ण रुपं ठप्प जूगु दु ।
बन्दया कारणं थौं स्वनिगःया येँ, यल, ख्वप बाहेक नेपालमण्डल लागाय् लाःगु भ्वँत, धौख्यः, पन्ति, बाह्रबिसे, दोल्खा, त्रिशुली, पालुङ, टिष्टुङ, सिन्धुलीया बजाः लागा समेत ठप्प जुयाच्वंगु दु ।
थौं स्वनिगलय् दुहां पिहां जुइगु लङ रुटया गाडी बन्द जुयाच्वंगु दुसा बन्दया कारणं स्वनिगःया जःखः लाःगु झिंछगू जिल्लाय् यातायात प्रभावित जुयाच्वंगु दु ।
थौं बन्दया झ्वलय् स्वनिगःया थीथी थासय् आपालं सवारी साधन तोडफोड जूगु दुसा गुलिखे थासय् निगू पुचः दथुइ ल्वापु जुयाः छुं बन्दकर्तात घाःपाः नं जूगु दु ।
थौं सुथय् ६ बजे निसें येँया थीथी थासं पिहां वःगु जुलुसं पसः तिकेगु लिसें लँय् चले याना वयाच्वंगु गाडी पनेगु ज्या याःगु खः । जुलुसं लुँमधिइ छगः मोटरसाइकल तोडफोड याःगु दुसा रत्नपार्कया ताँ क्वय् चायेकातःगु निगू होटेलया मेच टेबुल पिने हयाः च्याका बिउगु दु ।
बन्दकर्तातय्सं थौं लँय् साइकल तकं चले याके मबिलसा न्हापा लिपा बन्दया इलय् चायेकः वइगु फुटपाथ पसः तकं थौं बन्द यात । स्वनिगःया गल्लि गल्लि तकं थौं बन्द दु ।
बन्दकर्तातय्सं इमेज च्यानलया छगः गाडीइ नं कोपुण्डोलय् न्हाय्कं तछ्याना बिउगु दुसा चाबहिली 'जनादेश' वाःपौया छम्ह पत्रकारयात ल्हाः वाःगु दु ।
बन्दया झ्वलय् कुलेश्वरया फलफूल बजारय् छथ्वः मनूतय्सं बन्दकर्तातय्त आक्रमण यानाः प्यम्हेसित घाःपाः याका बिउगु दु । अन दुने पसः चायेकाच्वन धइगु सीकाः १०-१५ म्ह बन्दकर्ता दुहां वनाः पसः तिकः वंबलय् अन दुने कथि ज्वनाः च्वनाच्वंपिं ५०-६० म्ह मनूतय्सं उमित घेरे यानाः दाःगु खः । उकी लानाः नेपालभाषाया कार्यकर्ता धर्म मुनिकार छ्यनय् च्यागू टाँका तये मायेक घाःपाः जूगु दु । अथे हे नरेश महर्जन, विनोद खड्गी व मेम्ह छम्ह नं घाःपाः जूगु दु । उगु आक्रमणयां छुं भचा लिपा बन्दकर्तातय् तःधंगु हे पुचः बजारय् दुहां वनाः आपालं पसः स्यंकेगु नापं अन पिने दिकातःगु १४-१५ गः गाडी तोडफोड याना बिल ।
उकथं हे चाबहीया गोपीकृष्ण हलय् नं २०-२५ म्ह मनूतय्सं बन्दकर्तातय्त आक्रमण याःगु दु । थ्व मनूतय्सं बन्दकर्तायात आक्रमण यायेत्यंबलय् बन्दकर्तां हे उमित दाया छ्वत । लिपा प्रहरीं नं आक्रमण याःवःपिंत हे संरक्षण यानाः टिका नगरकोटी लगायत न्याम्ह बन्दकर्तातय्त ज्वना यंकूगु दु ।
अथे हे महाराजगंजय् नं मोटरसाइकल गया वःपिं छथ्वः गुण्डा पुचःयात पनेवं उमिसं तरवार लिकयाः बन्दकर्तायात आक्रमण याःगु दु । उकी लानाः तामाङ राष्ट्रिय मुक्ति मोर्चाया दुजः वीरबहादुर तामाङ घाःपाः जूगु दु । लिपा बन्दकर्तातय्सं गुण्डा पुचःयात हे आक्रमण यासें उकिया नाइके शिखर गुरुङयात ज्वनाः प्रहरीयात बुझे याना बिल । लिसें उमिगु निगः मोटरसाइकल नं कब्जाय् काःगु दु ।
थौं नेपालमण्डलया नेवाःतय्सं याःगु बन्दया प्रतिकार यायेत थीथी थासय् मनूत कुहां वःगुलिं उमित गुगुं थासं सुनियोजित रुपं हे परिचालन याःगु आशंका याःगु दु ।
(किपा - उदेन न्हूसाय्मि)
