अस्पताल तोडफोड जुयाः विरामी भागाभाग

येँ(सन्ध्या टाइम्स)/दोलखाया सदरमुकामय् च्वंगु च्छो रोल्पा जनरल अस्पतालया चिकित्सकय्गु लापरवाहीया कारणं विरामी सित धकाः स्थानीय मनूत व मदुम्हेसिया थःथितिपिंसं अस्पताल तोडफोड यायेवं अन भर्ना यानातःपिं विरामीत तकं भागाभाग जूगु दु।
चरिकोटया सातदोबाटो लागाय् च्वंगु ५५ बेडया उगु अस्पतालय् आक्रोशित भीडं तालं नं ग्वया बिउगु दु। भीडं अस्पतालया न्हाय्कंया झ्याः, दुनेया उपचार कक्ष, रिसेप्सन कक्ष, वासः पसः व अन तयातःगु वासः तकं तोडफोड याना बिउगु दु।
इमिसं विरामी व अस्पतालया कर्मचारीतय्त पिने पिकयाः अस्पतालया मू लुखाय् तालं ग्वया बिउगु खः।
स्थानीय भीमेश्वर नगरपालिका वडा नं. १ य् च्वंम्ह पासाङ शेर्पायात प्यतँजालं कुतुंवयाः म्हिगः बहनी १० बजे उगु अस्पतालय् हःगु जुयाच्वन। तर चिकित्सकतय्सं थौं सुथय् ८ बजे जक विरामीयात येँय् रिफर याना छ्वया बिल।
तर येँय् हयाच्वँच्वं हे शेर्पा लँय् हे मदुगुलिं इलय् हे वासः मयासे लापरवाही याःगु कारणं सीगु धकाः द्वपं बिसें थःथिति व स्थानीय मनूतय्सं अस्पतालय् तोडफोड सुरु याःगु खः। उमिसं अस्पताल लागाय् हे एम्बुलेन्सय् पासाङया सीम्ह तयाः प्रदर्शन समेत यानाच्वंगु दु।
स्थिति नियन्त्रणय् कायेत अन प्रहरी नं व्यापक रुपं
परिचालन यायेधुंकूगु दु।