कथि ज्वनाः सुकुम्बासी जुलुस

येँ(सन्ध्या टाइम्स)/संयुक्त सुकुम्बासी मोर्चा नेपालया ग्वसालय् थनिंनिसें सुकम्बासीत आन्दोलनय् कुहां वःगु दु। स्वनिगःया थीथी थासय् च्वनाच्वंपिं सुकुम्बासीया हक अधिकारया नितिं थौं सुथय् येँया शान्तिबाटिकां कथि ज्वनाः सिटी पुसें उमिसं दौड जुलुस पिकाःगु खः। दर्जनौं सुकुम्बासीतय्सं ब्वति काःगु उगु जुलुस देय् चाःहिलाः शान्तिबाटिकाय् हे थ्यंकाः कोणसभा यासें क्वचायेकूगु खः। इमिसं कन्हय् तिनकुनें सिटी जुलुस पिकायेगु व कंस थापाथलीइ मिसा व मस्तय्गु र्‍याली पिकायेगु ज्याझ्वः नं दयेकूगु दु।
अथे हे २५ गते पुनरावेदन अदालत वनेगु व थःपिनि पक्षय् सुनुवाई मजूसा २६ गते स्वनिगलय् सुथय् ९ निसें ११ बजे तक चक्का जाम, २७ गते मसाल जुलुस व २८ गते स्वनिगः बन्दया ख्याच्वः बिउगु दु। बागमती खुसि सिथय् सुकुम्बासीतय्त चीकेवं उपिं आन्दोलनय् कुहां वःगु खः।