'पार्टी सभापतिं तःक्वः झंगः लात'

गिरिजाप्रसाद व जिगु हैसियत बराबर: देउवा
येँ(सन्ध्या टाइम्स)/नेपाली कांग्रेसया बरिष्ठ नेता शेरबहादुर देउवां पार्टीया सभापति सुशील कोइरालां थःत तःक्वःमछि हे झंगः लानाः पार्टी दुने विवाद ज्यंकेगु थासय् झन तच्वयेकाच्वंगु द्वपं बियादीगु दु।
प्रेस युनियन रुपन्देहीपाखें थौं सुथय् बुटवलय् याःगु पत्रकार सम्मेलनय् न्ववासें वय्कलं थ्व द्वपं बियादीगु खः।
थःगु हे म्याद स्वला थप यानाः पार्टीया सभापतिं मखुगु खँ ल्हानाः निर्वाचित भातृ संगठनतय् म्याद धाःसा थप मयायेगु नापं सहमतिइ मवनेगु ज्या यानाः पार्टीया विवाद तच्वयेकूगु खँ वय्कलं कनादिल।
निर्वाचित भातृ संगठन भंग याये धुंकाः नं मध्यमार्गी नेतात रामशरण महत, नरहरि आचार्य लगायत लिसें भंग जूगु भातृ संगठनया अध्यक्षतय्त हे निर्वाचन तयारी समितिया संयोजक दयेकाः निर्वाचन यायेगु धकाः प्रस्ताव छ्वयाहःगु व लिपा व खँय् नं झंगः लाःगु द्वपं वय्कलं बियादिल।
थ्वहे दथुइ थौं नेपाली कांग्रेस पाल्पां अन याःगु कार्यकर्ता भेलाय् न्ववासें नेता देउवां पार्टी सभापति सुशील कोइरालां थःगु हैसियत ल्वःमंकल धयादीगु दु।
वय्कलं पार्टीया थःगु उचाई गिरिजाप्रसाद कोइरालाया बराबर खः धकाः दावी यासें उकियात सुशील कोइरालां थुइकेगु ज्या मयात धकाः तं प्वंकादिल।
कांग्रेसया नेता देउवां धयादिल 'न्हापा जि प्रधानमन्त्री जुयाः च्वनागु इलय् हे पार्टीं साधारण सदस्यपाखें पितिंगु खः। अबले पार्टी तछ्याये माल, लिपा निगू हे कांग्रेस एकता यानागु इलय् सभापति गिरिजाप्रसाद कोइराला व जिं ल्हाःचिं तयाः पार्टी एकता यानागु खः। पार्टी बल्लाःगु खः। आः पार्टी कमजोर जूगु दु उकिया जिम्मेवारी आःया सभापति सुशील कोइरालां कायेमाः।'
कार्यकर्ता भेलाय् न्ववासें वय्कलं धयादिल, 'पार्टीया नेतृत्व याये धुनाम्ह नापं स्वकः तक प्रधानमन्त्री जुइ धुनाम्ह जि खः।' वय्कलं आःया अवस्थाय् थःत हायेकेगु ज्या याये मजिउ धयादिल। 'निर्वाचित संस्था भंगः यायेगु प्रजातान्त्रिक ज्या मखु। कोइरालां पार्टीइ भाँडभैलो याःगु दु। कार्यकर्तात निराश जूगु दु। सुशीलं प्रजातन्त्रया खिल्ली उडे याःगु दु' वय्कलं धयादिल।
नेता देउवां आःया अवस्थाय् पार्टीयात देय्या दकलय् तःधंगु पार्टी यायेगु नितिं अभियानय् थः न्ह्याः वनाच्वनागु दु धकाः नं दावी यानादिल।