पित्याः प्याय‍्चाःया लागा

शाक्य सुरेन

वालः क्वथलाः,
जंगली किसि थें हारां जुया,
इच्छाया पित्याः/प्याय‍्चाः नं थौं
बस्ती बस्ती दुःख ब्यू वैच्वंगु दु ।

पित्याः लंके धकाः वःपिसं
प्याय‍्चाः तंके धकाः वःपिसं
इच्छाया लगाम फ्यनाः ब्यूगुलिं जकं शायद,
पित्याःया स्वच्छन्द/निर्बन्ध/निर्वाध
भयाबह लाखे प्याखंनं
थ्व परिवेश आतंकित याःवैच्वंगु,
अन्तहीन/लागाबिहिन प्याय‍्चाः नं
थन थाय् काःवैच्वंगु ।

हत्या/आत्महत्या, टेन्सन/डेप्रेशन,
घात/प्रतिघात व आघातं
थ्व जिगु म्हगसया आकास
दुषित याना बिल ।

खतु,
बर्षाया घनघोर घनघटाय् हे
न्हसला लुईगु/पल्पसा त्वैगु
चेतनाया किरण परावर्तन जुया
लाय‍्लामा लाय्लामा लुईगु/इन्द्र धनुख खनेदैगु ।

तर छम्ह गरिब,
चलखं ल्हाःवैगु भयं म्वानाच्वंम्ह
छम्ह नागरिकया पली धाःसा
हाकुम्ह को छम्ह हाः वैच्वन ।
वैगु मिखां सप्तरंगी लाय्लामा खनाच्वन ।
वैगु नुगलय् ख्वाउँक अपशकुन दुहाँवनाच्वन ।

More Stories Like this