तण्डुकार समाजया च्यागू समिति

येँ(सन्ध्या टाइम्स)/नेपाल तण्डुकार समाज केन्द्रीय समितिया न्हूगु ज्यासना पुचःया न्हापांगु बैठक वंगु थिंलाथ्व अष्टमी कुन्हु च्वन। मुँज्याय् दकलय् न्हापां संस्थापक अध्यक्ष बिष्णुभक्त तण्डुकारं नायः मदन तण्डुकारयात शपथ ग्रहण याकादीगु खः। वयां लिपा नायः मदन तण्डुकारं पुचःया मेपिं पदाधिकारीपिंत शपथ ग्रहण याकादीगु खः।
नेपाल पर्यटन वर्ष २०११ या लसताय् नेवाः संस्कृति, सम्पदा व सभ्यतायात नेवाः महोत्सवया संस्कार व दिशाबोधया रुपय् तण्डुकार समाजं प्याकेज ज्याझ्वः यायेगु निर्णय नं याःगु दु। थुकिया लिसें थीथी नेवाः जाति, खलः व सामाजिक संघ संस्थानाप समन्वयात्मक रुपं स्वापू क्वातुका यंकेगु लक्ष्य नं समाजं तःगु दु।
समाजया मुँज्यां संस्कृति व सामाजिक, शिक्षा व प्रचार, स्वास्थ्य सेवा, नारी कल्याण, कानुनी सेवा, युवा व स्वयंसेवक, युवा स्वरोजगार व वृद्धवृद्धापिंत सद्भाव सम्बन्धी च्यागू उपसमिति नं नीस्वंगु दु। थुपिं ख्यलय् तत्कालया ज्याझ्वः याना वनेगु लक्ष्य समाजं तःगु दु। थुगु समितिपाखें जुइगु कार्य नीति पूवंकेत रणनीति लागू याना यंकेगु नं समितिं क्वःछिउगु दु।
न्हूगु कार्यसमितिइ मदन तण्डुकार नायः, जेन तण्डुकार व गोपाल बहादुर तण्डुकार न्वकु, नरेन्द्रबहादुर तण्डुकार मूछ्यांज्ये, बिष्णुलाल तण्डुकार छ्यांज्ये, अर्जुन तण्डुकार दांभरि, नजरमान तण्डुकार लिउ दांभरि कथं ल्यःगु खः। अथे हे दुजलय् मन्दिरा तण्डुकार, कृष्णावती तण्डुकार, जनकलाल तण्डुकार, गोपाल तण्डुकार, बुद्धिबहादुर तण्डुकार, रवि तण्डुकार, मोहनकृष्ण तण्डुकार, चिरञ्जीवि तण्डुकार, नारायण तण्डुकार, हरिकृष्ण तण्डुकार, मच्छेनारायण तण्डुकार, रामकृष्ण तण्डुकार व श्रीकृष्ण तण्डुकारपिंत ल्यःगु खः।