वाई-फाईपाखें मिजंतय्त खतरा

ल्यापटपय् वाई-फाई टेक्निकं इन्टरनेट प्रयोग यायेबलय् मिजंतय्गु प्रजनन् क्षमताय् लिच्वः लायेफुगु आशंका जूगु दु। थुकी जुयाच्वंगु छगू शोधया झ्वलय् वैज्ञानिकतय्सं वाई-फाईपाखें प्रभावित जूगु वीर्य प्यघौया दुने हे नष्ट जुइ धाःगु दु। वैज्ञानिकतय्सं थुज्वःगु अवस्थाय् वीर्य साधारणया अपेक्षा म्हो जक खने दुगु खःसा उकिया जेनेटिक कोडय् नं हिउपाः खनेदत। अथे खःसां वैज्ञानिकतय्गु धापू कथं वास्तविक जीवनय् वाई-फाईया बांमलाःगु लिच्वः मलाये नं फु। 'फर्टीलिटी एन्ड स्टेरिलिटी' पत्रिकाय् पिदंगु अध्ययन कथं २९ म्ह स्वस्थ मिजंतय्गु वीर्यया नमूना मुंकाः परीक्षण याःगु खः।
अध्ययनया झ्वलय् हरेकया वीर्ययात निगः सिसीइ तल। उकी मध्ये छगः वाई-फाई ल्यापटपया न्ह्यःने तलसा मेगुयात ल्यापटप मदुथाय् तल। अर्जेन्टीना व अमेरिकाया वैज्ञानिकतय् धापू कथं वीर्यया नमूनाय् ल्यापटपं पिज्वःगु गर्मीया छुं नं लिच्वः मलात, थुथाय् लुमंके बहः जू कि गर्मीं वीर्ययात नकारात्मक लिच्वः लाकी।
ब्रिटेनया स्वास्थ्य सुरक्षा एजेन्सीं वाई-फाई सुरक्षित जू लाकि मजू धइगु बारे ताः ई न्ह्यवंनिसें अध्ययन यानाच्वंगु दु। एजेन्सीं वाई-फाईया प्रयोग याइपिं मनूत व उमिगु प्रभावय् वये फुपिं मनूत वाई-फाईपाखें पिज्वइगु रेडियोधर्मी सिग्नलया प्रभावय् दइ धाःगु दु। उगु सिग्नलया क्षमता अप्वः मदइगु जूसां मनूतय्गु म्हं छुं हदतक उकियात सोसे याइ धइगु खँ सीदुगु दु। तर वाई-फाईपाखें पिज्वइगु रेडियोधर्मीं मिजंतय्गु प्रजनन् क्षमताय् नकारात्मक लिच्वः लाइ धइगु खँया क्वातुगु प्रमाण धाःसा मलूनिगु खँ नं धाःगु दु। अथे खःसां मिजंतय्सं ताः ई तक ल्यापटप मुलय् तयाः चले मयाःसा बांलाइगु सल्लाह डा. ऐलन पेसीं बिउगु दु।