डा. बाबुराम सरकारया सछिन्हु

प्रधानमन्त्री डा. बाबुराम भट्टराईया सरकारं सछिन्हु पूवंकुगु दु। वय्कःया सछिन्हुया कार्यकाल छुं भचा थथ्याःक्वथ्याः जूसां पूर्ण रुपं असफल थ्यंक धायेम्वाःगु स्थितिइ दु। वर्तमान सरकारया मूल्यांकन यायेबलय् थुकियात शान्ति प्रक्रियाय् वनाच्वंगु छगू संक्रमणकालीन मुलुकया सरकार खः धइगु खँयात ल्वःमंके मजिउ। थज्याःगु सरकारं जनताया न्हियान्हिथंया जीवनयात प्रभावित याइगु छुं नं ज्या याये मफइगु निश्चित दु। भट्टराईया सरकारं नं अज्याःगु छुं नं ज्या याये मफुत। गुकिं यानाः देशय् हत्या, लुटपाट, महंगी, अराजकता थेंज्याःगु अवस्था यथावत् हे जुयाच्वनसा उखे कर्मचारीतन्त्रय् व्याप्त भ्रष्टाचार न्हापा स्वयां अप्वःगु अनुभव जनतां याये मालाच्वन। खास यानाः थीथी पार्टीयात कःघायेमाःगुलिं मन्त्रिमण्डलय् अत्यधिक मन्त्रीत दुथ्याकूगु कारणं वय्कःया सरकार दकलय् अप्वः आलोचित जुल। लिसें सरकारय् दुथ्याःपिं मन्त्रीतय् कर्तूत व विगतया कारणं नं वय्कलं जनताया ब्वः फये माल। अथे खःसां उकथं आलोचित जूपिं मन्त्रीतय्त पदं चीकाः वय्कलं थःगु छबी धाःसा बांलाकादीगु दु।
थुपिं छुं छुं आलोचनायात त्वःताः धायेगु खःसा दिनाच्वंगु शान्ति प्रक्रियायात वय्कलं गुगु गति बियादिल, व धाःसा दकलय् च्वछायेबहःगु पक्ष खः। सेना समायोजनया ज्यायात वय्कलं सुचारु यानादिल, संविधान च्वज्याय् वयाच्वंगु पंगः चीकादिल। थ्व ज्याय् वय्कःयात जःलाखःला देय् भारतं नं गाक्कं साथ बिल। पार्टी दुने तःधंगु आलोचना वःसां थ्व ज्या यानाः जनताय् धाःसा वय्कः लोकप्रिय जुयादिल। अथे खःसां वय्कःया धाथेंया परीक्षा धाःसा आः सुरु जुइगु खँय् विवाद मदु।

More Stories Like this