जनकपुरय् सुथंनिसें तोडफोड

येँ(सन्ध्या टाइम्स)/सवारी साधन तोडफोड याना बिउगु विरोधय् थौं यातायात व्यवसायीतय्सं जनकपुर अञ्चलय् सार्वजनिक यातायात बन्द याःगु दु।
दिकातःगु मोटरसाइकलयात बसं ठक्कर नकाः मनू सीगु घटनायात कयाः स्थानीयवासीं म्हिगः जनकपुरय् निगः बस तोडफोड यानाः च्याका बिउगु विरोधय् यातायात व्यवसायीतय्सं थौं बन्दया आह्वान याःगु खः।
बसया ठक्करं मेडिकल ब्वनाच्वंम्ह विद्यार्थी सीगु खः। उगु घटनाया विरोध यासें विद्यार्थीतय्सं म्हिगः गाडी तोडफोड याःगु खः। पासायात स्याःगु विरोधय् विद्यार्थीतय्सं थौं नं सुथंनिसें प्रदर्शन यानाच्वंगु दु। थ्व झ्वलय् उमिसं जिल्ला विकास समिति धनुषाया स्वंगः गाडी तोडफोड याना बिउगु दु।
म्हिगः बसया ठक्करं सर्वेशलाल कर्ण सीगु खःसा मेपिं निम्ह नं घाःपाः जूगु खः। विद्यार्थीतय्सं प्रदर्शन यानाच्वंगुलिं उगु लागा सुथंनिसें हे तनावग्रस्त जूगु दुसा सुरक्षाकर्मी व्यापक रुपं परिचालन यानातःगु दु।