विस्थापित सेना-प्रहरी व सुरक्षाकर्मी दथुइ ल्वापु

येँ(सन्ध्या टाइम्स)/द्वन्द्वया इलय् विस्थापित जूपिं नेपाली सेना व प्रहरीया दर्जनौं जवानत व सुरक्षाकर्मी दथुइ थौं सुथय् येँया माइतिघर मण्डला लागाय् ल्वापु जूगु दुसा उकिं यानाः उगु लागा तनावग्रस्त जूवंगु दु।
विस्थापित सेना व प्रहरीतय्सं उगु लागाय् याःगु प्रदर्शनय् सुरक्षाकर्मीतय्सं हस्तक्षेप यायेवं निथ्वःसिया दथुइ ल्वापु जूगु खः।
ल्वापु नियन्त्रणय् कायेत प्रहरीं टियर ग्याँस तकं कयेकूगु खः। प्रदर्शन याये मदु धकाः प्रशासनं निषेध यानातःगु लागाय् हे विस्थापित सेना व प्रहरी जवानतय्सं प्रदर्शन याःगुलिं अन प्रहरीं हस्तक्षेप याःगु खः।
प्रदर्शनकारीतय्त नियन्त्रणय् कायेत स्वःगु इलय् ल्वापु जुयाः अन यातायात साधन संचालनय् तकं पंगः ब्वलंगु दु।
थःपिंत पुलांगु हे सेवाय् पुनर्स्थापना यायेमाःगु, राहतया व्यवस्था यायेमाःगु नापं थीथी कथंया माग तयाः विस्थापित सेना व प्रहरीतय्सं ताः ई न्ह्यःनिसें राजधानी केन्द्रित आन्दोलन याना वयाच्वंगु खः।
वंगु मंसिर १४ गते न्ह्यः हे येँया जिल्ला प्रशासन कार्यालयपाखें माइतिघर लागांनिसें संविधानसभाया जःखःया लागायात सुरक्षाया कारण क्यनाः प्रदर्शन निषेधित क्षेत्र धकाः घोषणा याःगु खः।