पुनर्संरचना आयोगय् चलखेल

पहिचानयात स्वीकार मयाइपिं दुजःत थपे जुइन
येँ(सन्ध्या टाइम्स)/छक्वलं च्याम्ह दुजः तयाः गठन याःगु राज्य पुनर्संरचना आयोगया 'ख्वाःपाः' खनाः आदिवासी जनजातित लय्ताःगु खःसां आः सरकारं जनजातिया उगु लसतायात ताःई टिके मयाइगु जूगु दु। आयोगय् दलित समुदायपाखें न्हूम्ह दुजः कथं थपे याये हःम्ह डा. मदन परियारयात आयोगया संयोजक समेत तोके याना बिउगुलिं आयोगया पुलांगु समीकरणय् हिउपाः वइगु सम्भावना खनेदुगु दु।
डा. मदन परियारया नां प्रधानमन्त्री डा.बाबुराम भट्टराईनं सिफारिस यानादीगु खःसां वय्कः मुलतः एमाले समर्थित विज्ञ खः। वय्कलं एमाले कार्यकर्तातय्सं सञ्चालन यानाच्वंगु एनजीओ इन्सेकय् नं ज्या यानादीधुंकूम्ह खः। राज्य पुनर्संरचनाया सवालय् वय्कः पहिचानयात प्राथमिकता बी मजिउ धइगु पक्षयाम्ह खः। देशय् आदिवासी जनजाति व दलित समुदाय छथाय् हे च्वनाः समानताया आन्दोलन याःगु खःसां अप्वः दलित बुद्धिजीवीत धाःसा पहिचानया लिधंसाय् राज्य पुनर्संरचना याये मजिउ धइगु पक्षय् दु। आः वहे पक्षयाम्ह दलित बुद्धिजीवीयात आयोगया संयोजक दयेकूगुलिं आयोगं न्हापा आशा याः कथंया लिच्वः पिकाइगु सम्भावना म्हो जूवंगु दु।
थुकिया नापं आः आयोगय् मुस्मां समुदायपाखें नं छम्ह दुजः दुथ्याकेगु सहमति सरकारं यायेधुंकूगु दु। मुस्मां दुजःया प्रवेश जुइवं आयोगया समीकरण झन् हे स्यं वनीगु आशंका थन याना हःगु दु। मुस्मां समुदायं नं जातीय पहिचानया लिधंसाय् राज्य पुनर्संरचना यायेगु बिचाःयात स्वीकार याःगु मदुनि।
थौंकन्हय् आयोगय् दुपिं च्याम्ह दुजःत मध्ये न्याम्ह पहिचानयात प्राथमिकता बीपिं व स्वम्ह सामर्थ्ययात प्राथमिकता बीपिं जुयाच्वंगु खः। उकी सामर्थ्ययात प्राथमिकता बीपिं निम्ह थपे यायेसातकि आः आयोगया समीकरणय् न्याम्ह न्याम्हेसिया पुचः जू वनीगु सम्भावना ब्वलंगु दु। थथे जुल धाःसा उकुन्हु तक आयोगं गुकथंया प्रतिवेदन बी धकाः अनुमान जुयाच्वंगु खः, आः अथे जुइगु सम्भावना म्हो जूगु खँ विज्ञतय्सं धयाहःगु दु।
आयोगय् न्हूम्ह दुजः थपे जुइगु वा वयात हे संयोजक तोके याइगु बारे थुकिया च्याम्ह दुजःतय्त धाःसा छुं हे जानकारी मदुगु खँ धाःगु दु। आयोगय् आः दुपिं च्याम्ह दुजःतय्सं थवंथवय् हे पालंपाः संयोजक जुयाः ज्या यायेगु धासें उकिया छम्ह दुजः डा. कृष्ण हाछेथुयात प्रवक्ता समेत नियुक्त यायेधुंकूगु दु। न्हूम्ह संयोजक वयेवं आयोगपाखें आः तक याना वयाच्वंगु ज्याय् नं हिउपाः वइगु खँ धाःगु दु।
सरकारं सुरुइ जनजाति अप्वः तयाः गठन याःगु आयोगय् आः छम्ह छम्ह यानाः गैरजनजाति थपे याना हःगुलिं जनजातित संशकित जूगु दु।