छाय् जोकर जुइगु !

नर्मदेश्वर प्रधान
तर छता खँ लुमनावइ। अक्सर मोहनि स्वन्तिपाखे पुलिसतसें लँय् लँय् लाइसेन्सया जाँच याना हइ। खूब कडा याइ। मनूतसें धाइ। पुलिसतय्त मोहनि स्वन्तिं थिल। खर्च स्वहायेके माल। लाइसेन्स जाँच सुरु जुल। खः नं खः।
खँयाखँय्

पाल्पां बुटवलपाखे वयाच्वने। सुथ पाखे। जा नयेगु ई जुइ। गन नयेगु? थाय् परिचित मखु। नये पित्याना वइ। गनं नये माली ! केरावारीइ नये। निर्णय जुइ। केरावारी कुहां वये। न्याम्ह दु। गुगु पसलय् दुहां वने? बांलाःगु गुगु सिउगु मखु। लँय् वनाच्वने। छगू पसलं धया हइ "न्ह्याथाय्सां नयेगु हे खः नि? झासँ झासँ।" बिचाः छुं मयासें वहे पसलय् दुहां वने। थकालितय् पसः जुयाच्वनी।
यात्राय् वने। इलय्-ब्यलय् तःथाय् जा नये नं। तर अनुभवत उलि बांलाः मजू। गनं जा ख्वाउँसे च्वनी। तरकारी छकू। गनं फ्वना च्वनेमाली। हालाच्वने। नयेत अलमलय् याइ। मताःछु याइ? छले यानाच्वनी। ध्यबा पुले। सन्तोष गबलें दइ मखु। यात्राय् छछाः गतिलाक्क नयेत दुसा जिउ। निगः प्यंगः अप्व पुलेमासां छुं मदु? तर छु याये। ध्यबा जुक्क काइ। खानाया स्तर क्वह्यनी। मनसें गाइ मखु। नये माली।
थुगसी। मोहनि स्वन्तिपाखे। बजार अनुगमनं खूब हल्ला याइ। न्यूरोडया गुँडपाख भण्डारयात गुणस्तरहीन खंकी। नामेत याना बी। रेष्टुरेण्ट, होटलय् वनी। दुषित खाद्यपदार्थया विरोधय् अभियान न्ह्याकी। न्हिंन्हिं थें अनुगमनया ज्या प्रचारय् वइ। मनूतय्त विश्वास जुइ। अनुगमन टोलीया न्ह्यलं चाल। जुरुमुरुं दंगु दु। अस्वस्थकरस्तरहीन नसाया विरोधय् तःधंगु पलाः छिउगु दु। अनुगमन पुचः पसःपसः चाःहिली। फ्याक्ट्री�फ्याक्ट्री आकस्मिक निरीक्षण याइ। खबरवयाच्वनी। ब्वने। लँय् लँय् राजमार्गपाखे नं अनुगमन पुचः ताते जुइ। राजमार्गय् अनेक भोजन गृहय् वनी। अन नकीगु खाना गुणस्तर जू मजू स्वइ। भाः जायज जू मजू सीकी। खानाया गुणस्तर कायम याये। मनासिब मू निश्चित जुइमाः। मनोमानिक मू कयाः ग्राहक ठगे याये दइ मखु। अस्वस्थकर खाना बियाः ग्राहकतय् स्वास्थलिसे खेलवाद याये दइ मखु। नेपाल सरकारया अनुगमन पुचः राजमार्गय् यात्रुतय् स्वस्थकर खानाया पक्षय् अभियान न्ह्याकी। अनुचित मू कयाः ठगी याइपिं पसल्यातय्त ख्याच्वः बी। न्हियान्हिथं अखबारय् अनुगमनया खबरत ब्वने। ढुक्क जुइ। आः पिहां वनेबलय् यात्राय् जा बांलाक नये दइगु जुल। ध्यबा ठगे याके माली मखुत। लय्ताः वइ। मानौं देशय् तःधंगु हिउपाः वये त्यन। जनताया पक्षय् कल्याणकारी युग वइन।
थाय्थासय् स्वय्म प्रधानमन्त्रीं हे अनुगमन याःगु बुखँत वइ। चबूगु पुल निरीक्षणया किपा अखबारय् स्वये। ट्वाइलेटया स्थिति बारे जाँचबुझ याःगु बुखँत ब्वने। मन झिकु थहां वइ। आः धात्थे रामराज्य हे वइन। राजमार्गया यात्रा तसंक हे न्ह्याइपुइ। सुविधायुक्त जुइ। लाखौं मनूत राजमार्गय् वये-वने जुया च्वनेमाः। अस्वस्थकर खाना नइ। ध्यबा काइ। प्वाः जायेक नकी मखु। न ट्वाइलेटया सुविधा न हानीमुक्त लः। राजमार्ग यात्रा ल्वय् पीगु थें जुया बी। देशया प्रधानमन्त्रीं हे थुकिया चिउताः कया हइ। आः छु मानि ! राजमार्गय् यात्रा याइपिंत लय्तायाः खँ जुइ। जनताया स्वास्थ, सुविधाया थुलि ग्यंक चिउता तइम्ह प्रधानमन्त्री। वय्कःयात हाइ हाइ धायेमाः। प्रशंसा यायेमाः। धन्यवाद बीमाः। बिचाः वइ। तर मनय् खँत ल्वाकःबुकः जुइ। धन्यवाद बीगु छखे लाइ।
थन पुलांम्ह विद्युतमन्त्री गोकर्ण बिष्ट लुमनी। एमालेया मन्त्री बिष्ट थःगु कार्यकालय् खूब प्रचारय् वइ। न्हियान्हिथं अखबारय् प्रशंसा जुइ। गोकर्ण बिष्टयात उबलय् टि.भी. खनी। न्ह्यःने न्ह्यःने थः झण्डावाल मोटरय्। लिउने लिउने ताताःहाकः स्वाहाने दुगु मोटरय् विद्युत कर्पोरेशनया कर्मचारीत। थाय्थासय् अफिसय् , छेँ वनी। ध्यबा मपूपिनिगु बिजुली तार चाना बी। मन्त्रीजुया उपस्थितिइ बिजुली ध्यबा मपूपिं सरकारया अफिसत नं दइ। मन्त्री स्वय्म वनाः विद्युत महशुल मबिउपिनी तार चाः वनेगु। पिनें स्वयेबलय् मन्त्रीजुया महानता खने दइ। थःगु मन्त्री पदयात हे चिउताः मतसे देशया सेवा याइम्ह युवा नेता गोकर्ण बिष्टया प्रशंसा जुइ। मन्त्री गोकर्ण बिष्ट लँय् कुहां वल। जनताया सेवा याः वल। जनताया सेवाया नितिं मान मर्यादा, इज्जतया पर्वाह मतल। प्रधानमन्त्री भट्टराई बिष्ट स्वयां अप्वः प्रशंसाया पात्र जुइ। प्रधानमन्त्री जुयाः नं राजमार्गया यात्रुतय् सुविधाया चिन्ता दुम्ह भट्टराईपाखें जनतां आशा याइ। स्वाभाविक।
तर छता खँ लुमनावइ। अक्सर मोहनि स्वन्तिपाखे पुलिसतसें लँय् लँय् लाइसेन्सया जाँच याना हइ। खूब कडा याइ। मनूतसें धाइ। पुलिसतय्त मोहनि स्वन्तिं थिल। खर्च स्वहायेके माल। लाइसेन्स जाँच सुरु जुल। खः नं खः। लाइसेन्स जाँच निरन्तर यायेमाःगु जाँच खः। छाय् मोहनि स्वन्तिया साइत पीमाःगु? थ्व खँय् पुलिसतय्त शंका गय् मयाइ?
अनुगमन स्वसः खुइन्हु फुक्कथाय् नियमित याये माःगु कार्य खः। मोहनि, स्वन्तिबलय् जक क्यनेगु पर्व नाटक मखु। हानं प्रधानमन्त्री, मन्त्रीतय् ज्या भोजनगृह नियन्त्रण यायेगु, बिजुली चाः वनेगु मखु। थ्व दंगु प्रचारया लोभीतसें जक याइगु ज्या खः। नीति निर्माण दयेकाः कार्यान्वयनया यन्त्रयात क्वातुक्क नेतृत्व बीमाःपिंसं सडक नाटकय् जोकर जुइगु पाय्छि जुइ मखु। हल्ला याना प्रचारय् वःगु अनुगमन थौं शिथिल जुइ। प्रभावहीन जुइ। लःफ्वः थें तज्याइ। फुक्क फय्गं जुइ। उखुन्हुया पाल्पां बुटवलय् वयाबलय्या घटनां साबित याइ।
केरावारीया जा नयेगु पसलय्। अनुगमन लुमंकु लुमंकु दुहां वने। बांलाक छचाः नये दइ। मनासिब मोलय्। ढुक्क जुइ। मेचय् फ्यतुइ। पसलया न्यापाः भुइ जा तये हइ। केँ, तरकारी। व पसलय् मदयेधुंकल। साहुनी लिक्क पसलय् वनी। भचा भचा कया हइ। तरकारी, केँ। लिसा ति धाये। दइ मखु। स्वकः जा नकी। पसःथुवाः। स्वये लसिं थें। पाइन्ट न्ह्याना तःम्ह। जिपिं उपभोक्ता। तं चाये। छुं मदय्क छाय सःताः? धाये। मिसां खँ हीकी। ध्यबाया फुर्ति क्यनागु ला? ध्यबा धइगु थौं दइ। कने मदइ। अभिमान याये मजिउ। स्वकः जा नकी। जिमित म्हुतुप्वाः तिकेत स्वइ। खँ हीकी। खँ पुइकी। सकस्यां प्वाः खालि। न्यासः दां काइ। मोहनि, स्वन्ति पाखेया अनुगमन लुमनी। प्रधानमन्त्रीया निरीक्षण भ्रमण लुमनी। छखेर प्रशंसा, होहल्ला न्हाय्पनय् थ्वइ। मेखेर प्वाःथय् सितार थाइ। तं पिहां वइ। जोश वइ। स्वनिगलय् वने। प्रधानमन्त्रीया "हेलो" उजुरी शाखाय् फोन याये। ध्यान साले।
स्वनिगलय् थ्यनी। जोश क्वलाइ। मती मती धाये। फोन याना छु हे जुइ? छाय् जोकर जुइगु?

More Stories Like this