गः कियाः मनू स्याना तल

येँ(सन्ध्या टाइम्स)/यलय् लुँ पसलय् ज्या याइम्ह मनू स्यानातःगु घटना क्वलाये मलाःनिवं येँया पेप्सीकोला लागाय् छम्ह मनू स्यानातःगु लूगु दु। पेप्सीकोलाया ३५ दँ दुम्ह गोविन्द ढुंगानायात गःकियाः विभत्स ढंगं स्यानातःगु अवस्थाय् थौं सुथय् लुइकूगु खः। ढुंगानाया सीम्ह वयागु हे छेँ लिक्क गल्लिइ लुयावःगु खः। सुथ न्हापां लः कायेत पिहांवःपिं स्थानीय मनूतय्सं मनू स्यानातःगु खनेवं प्रहरीयात खबर याःगु खः। ढुंगाना नेपाल वायुसेवा निगमय् ज्या याइम्ह खः। वयात सोमवाः चान्हय् स्याःगु अनुमान प्रहरीं याःगु दु। घटनास्थलय् अय्लाः सिसि, जग, प्लेट, गिलास नापं मेमेगु सामान लुयावःगु दु। लिसें मि न च्याकातःगु खनेदु। प्रहरीं घटनायात कयाः अनुसन्धान यानाच्वंगु दुसा स्थानीय छगू होटल व्यवसायी नापं स्वम्हेसित ज्वनाः न्यनेकने याःगु दु।