भाः थकाःसा लोडसेडिङ म्हो जुइ: उर्जामन्त्री
येँ(सन्ध्या टाइम्स)/नेपाल विद्युत प्राधिकरणं न्हिं १९ घण्टा तक लोडसेडिङ यायेमालीगु अवस्था दु धयाच्वंगु इलय् उर्जामन्त्री पोष्टबहादुर बोगटीं मतया भाः थकायेत सहमति जुल धाःसा लोडसेडिङ न्हिं ४ निसें ५ घण्टा तक क्वपालेगु दावी यानादीगु दु।
रिपोर्टर्स क्लबं थौं याःगु ज्याझ्वलय् न्ववासें मन्त्री बोगटीं थ्व दावी यानादीगु खः। वय्कलं मतया भाः थकायेगु खत धाःसा भारतं थप विद्युत न्यानाः जूसां लोडसेडिङ म्हो याये धयादिल।
मन्त्री बोगटीं मत प्रति युनिट घाटा स्वतका जुयाच्वंगु अवस्था दु धासें भाः थकायेगु खःसा भारतं थप १०० मेगावाट विद्युत न्यायेगु व थर्मल नापं डिजिटल प्लान्टपाखें विद्युत उत्पादन यानाः इने फइ धयादिल।
आः नेपाल विद्युत प्राधिकरणं भारतपाखें १०० मेगावाट मत नेपाःया प्रसारण लाइनय् स्वाके धुंकल धासें वयकलं भाः थकाये फत धाःसा भारतपाखें अझ अप्वः मत न्याये फइगु दावी नं यानादीगु दु।
