कैदीतय् ल्वापु जुयाः प्यम्ह घाःपाः
येँ(सन्ध्या टाइम्स)/चितवनया भरतपुरय् च्वंगु जिल्ला कारागारय् कुनातःपिं कैदीतय् दथुइ ल्वापु जुयाः प्यम्ह कैदी घाःपाः जूगु दु। कैदीतय् दथुइ थवंथवय् जूगु विवाद तच्वया वनाः लिपा हिंसात्मक रुप काः वंगु खँ प्रहरीं धाःगु दु।
ल्वापुइ लानाः कैदीत प्रदीप भट्ट, बद्री ढुंगाना, शिवप्रसाद पौडेल व मदन परियार घाःपाः जूगु खः।
घाःपाः जूपिं मध्ये नेपाली कांग्रेसया भातृ संगठन नेपाल तरुण दलया जिल्ला अध्यक्ष शिव पौडेल नं लाःगु दु। घाःपाः जूपिं प्यम्ह मध्ये शिव प्रसाद पौडेल व मदन परियारया अवस्था गम्भीर दु।
इमित भरतपुरया मेडिकल कलेजय् वासः याका तःगु दु। कैदीतय्सं ल्वापुइ हितिया ह्याण्डिल, जा थुइगु धवः पन्यु व जासि थलं समेत कयेकेगु ज्या याःगु खः। हितिया ह्याण्डिलं छ्यनय् लानाः घाःपाः जूम्ह शिव पौडेल व मदन परियारया अवस्था गम्भीर जूगु खः।
कैदीतय् दथुइ छु खँय् ल्वापु जूगु धकाः सीके मफुनिसा उगु घटनायात कयाः प्रहरी उपरीक्षक खिनु प्रसाद आचार्यया नेतृत्वय् अनुसन्धान यानाच्वंगु दु।
