पाल्पाय् नं धिमय् प्रशिक्षण

पाल्पाय् नं धिमय् प्रशिक्षण न्ह्याःगु दु । नेवाः देय् दबूया ग्वहालिइ पासा खलः पाल्पाया ग्वसालय् वंगु शनिवाःनिसें अन धिमय् प्रशिक्षण न्ह्याःगु खः ।

शनिवाः छगू ज्याझ्वःया दथुइ प्रशिक्षणया उलेज्या जूगु दु । ज्याझ्वलय् मूपाहां प्रेममान शाक्यं सुकुन्दाय् मत च्याकाः ज्याझ्वःया उलेज्या यानादिल । उलेज्याझ्वलय् नायः सह प्राध्यापक भाजु छत्रराज शाक्यं पासा खलः पाल्पा नेस ११०१ य स्थापना जुसांनिसें वंगु २९ दँ दुने याःगु थीथी ऐतिहासिक ज्याया चर्चा याना यानादिल । 'तानसेन पाल्पाय् नेवाः संस्कृतिया धिमय् बाजं थायेगु म्हो जुयावंगु व थाये सःपिं मदया बुलहुं तना वंगु जुया हाकनं धिमय् बाजं थायेगु संरक्षण व उन्नति यायेया निम्ति पासा खलः पाखें थुगु तालिमया संचालन जूगु खः', वय्कलं धयादिल ।

धिमय् बाजं गुरु ज्यापु महागुथि येँया दुजः भाजु शेष नारायण महर्जनं तानसेनया नेवाः दाजु किजापिंत धिमे बाजं सेनेगु अवसर प्राप्त जुगुलिं लयता खँ प्वंकादिल । पासा खलःया सल्लाहकार व उपन्यासकार भाजु चिनियालाल बज्राचार्यं पासा खलकं तानसेनय् दकले न्हापां धिमय् बाजं तालिम संचालन याना ऐतिहासिक ज्या याःगुलिं सुभाय् लिसे भिंतुना देछाना दिल । पासा खलःया छ्याजे व तालिमया संयोजक भाजु देवेन्द्र मान शाक्यं लसकुस यासें तालिम लच्छि यंक संचालन जुइगु खँ धयादिसें धिमे बाजं गुरु शेषनारायण महर्जन व प्याखं स्यनामि मयजु सानुमैयां महर्जनया म्हसीका बियादिल । उलेज्याझ्वःया संचालन खलःया मू दुजः मयजु अर्चना शाक्यपाखें जुगु खः ।

पासा खलःया नायः भाजु छत्रराज शाक्यं तछलाथ्वः अष्टमि कुन्हु सुथय् मंगल सूत्र पाठ यानास् सुकुन्दाय् मत च्याका प्रशिक्षण शुभारम्भ याना दिलसा धिमय् बाजं गुरु भाजु शेषनारायण महर्जनजुं स्तोत्र पाठ याना कक्षा संचालन यानादिल ।

(अर्चना शाक्यपाखें प्राप्त जानकारीया लिधंसाय्)

More Stories Like this