लडाकु सम्पर्क पिने लानाच्वंगु दावी

'गायब धाःसां भत्ता यंकातःगु भ्वँतय् हस्ताक्षर दु'

येँ(सन्ध्या टाइम्स)/थीथी शिविरं गायब जुयाच्वंपिं माओवादी लडाकुत थौंकन्हय् सम्पर्क स्वयां तापाक लानाच्वंगुलिं जक शिविरय् खने मदुगु खः, उपिं सम्पर्कय् वयेवं न्हापा बियातःगु ल्याः पूवनीगु दावी शान्तिमन्त्री सत्या पहाडीं यानादीगु दु ।

माओवादीया स्वद्वःम्ह लडाकु गायब जुयाच्वंगु दु तर उमित बीमाःगु भत्ता धाःसा यंकातःगु खने दुगुलिं माओवादीं दथुइ च्वनाः मखुगु ज्या यानाच्वन धइगु खँ पिहां वयाच्वंगु इलय् लडाकुलिसे सम्बन्धित शान्तिमन्त्रीं थज्याःगु दावी यानादीगु खः। वय्कलं गुलिखे लडाकुत छेँय् वनाच्वंगु, गुलिं ज्या विशेषं यानाः पिहां वनाच्वंगु व गुलिं चाहिं तालिम कायेगु लागि विदेशपाखे वनाच्वंगु नं जुइफु धासें उपिं सर्म्पकय् वइगु दावी समेत यानादीगु दु ।

माओवादी लडाकुत पिने वनाच्वंगु जुइफु धकाः दावी याःसां उपिं सु गन वनाच्वंगु खः धइगु विवरण धाःसा वय्कलं पेश याना मदी। शिविरय् लडाकुत मदुसां उमित बीमाःगु तलब भत्ता धाःसा यंकातःगु खनेदु धइगु जिज्ञासाय् वय्कलं भत्ता बुझे यानाः कायेत शिविरय् च्वंपिं सकस्यां हस्ताक्षर यायेमाः, भत्ता बुझे यायेगु फारामय् सकस्यां हस्ताक्षर यानातःगु दुगुलिं उमित मनू हे मदयेक भत्ता काःगु धकाः द्वपं बी मजिउगु दावी नं वय्कलं यानादीगु दु। छुं जुयाः लडाकुत धाथें बेपत्ता हे जूगु खः व द हे मदयेक उमिसं भत्ता नापं यंकातःगु खःसा उकी मन्त्रालयपाखें छानबिन यानाः अप्वः यंकातःगु भत्ता लित कायेगु तकं ज्या जुइ धकाः नं वय्कलं धयादिल ।

शिविरय् स्वद्वःम्ह लडाकु मदये धुंकूगु खँयात कयाः एमाले व कांग्रेस नेतातय्सं न्ह्यसः तसें अन दुपिं लडाकुत हे पिहां वंगु खः लाकि न्हापा अनमिनं द हे मदुपिनिगु नां नं दर्ता याना बिउगु खः धकाः समेत आशंका याना हयाच्वंगु दु ।

बेपत्ता २३०० म्ह जक
शिविरय् च्वनाच्वंपिं माओवादी लडाकु गायब जुल धकाः पिहां वःगु समाचारयात कयाः एनेकपा (माओवादी) पाखें आः तक स्पष्ट खँ पिहां मवःसां लडाकुया कमाण्डर नन्द किशोर पुन (पासाङं) धाःसा बेपत्ता जुयाच्वंपिं ल्याः स्वद्वः मखु, मुक्कं २३०० म्ह जक अनुपस्थित जूगु खः धयादीगु दु। म्हिगः बहनी बीबीसी नेपाली सेवालिसे खँ ल्हासें वय्कलं थुकिया बारे थःपिंसं फुक्कं शिविरया लगत कयाः स्वयाबलय् नीनिसःम्ह लडाकु खने मदुगु सीदु धासें उकियात अप्वः क्यनाः अनावश्यक हल्ला यानाच्वंगु द्वपं नं बियादिल। अनुपस्थित धाःपिं लडाकुत छाय् न्ह्यःने मवल धइगु बारे थःपिंसं छानबिन यानाच्वनागु दु धासें वय्कलं गुलिं दथुइ हे शिविर त्वःता वंपिं दुसां गुलिं चाहिं पार्टीया आन्तरिक कचवंया कारणं पुनर्वर्गीकरणय् मवःगु जुइफु धकाः नं धयादिल ।