"झीगु देय्" राष्ट्रभक्तिं जाःगु सीडी

श्याम उदय

झीगु देय्या म्हसीका, देय्या लागा खालि येँ, यल व ख्वप जक मखु। मात्र पूर्व मेची व पश्चिम महाकाली तक देय्या परिचय मखु।झीगु जाति-जातिया लाली, जातिया भेषभूषा, जातिया भाषा गुकिं झीगु नेपाः, नेपाः जुयाच्वन, उकी हे झीगु म्हसीका व झी नेवाः जुयाया गौरव कायम जुयाच्वंगु दु। देशया थज्याःगु गौरवयात सदां म्वाका तयेत झीसं झीगु स्वाभिमान तंके मजिउ धइगु सन्देश ज्वनाः पिलू वःगु जागरण म्येँया छगू न्हूगु संग्रह सीडी खः� 'झीगु देय्'।
थ्व सीडीइ नेवाःतय् दथुइ थम्हं खंके मफुगु कमजोरी, नेवाःत थःथःहे ल्वानाच्वनीगु विडम्बना, जातिया पहिचान सिबें भाषाया गौरव सिबें नं थःहे तःधं धइगु अहमं झी नेवाःत सुं ब्यक्ति विशेषया त्वाथः जुयाच्वंगु दु। थःगु कमजोरीयात झीसं इलय् हे म्हसीके मफुत धाःसा झी न्ह्याबलें 'भाषा भाषा' धकाः जक हालाच्वनी, उकिया लबः धाःसा मेपिंसं कया यंकी। अले झीगु भाषा झन् झन् लिकुना वनी।
खः, झीगु देय् हिमाल, पहाड, तराई नापं विविधतां जाःगु संस्कृतिं भय् बिउगु देय् खः। थ्व देय् सकसितं यः। थ्वहे नेपाःमि जुयाया विशेषता खः। तर झीसं झीगु देय् यः धकाः जक नं च्वने मजीधुंकल। थः मस्तय्त नं थःगु जाति-भाषा-संस्कृतिलिसे भ्यले पुंका यंके माल। अले जक झीसं नेवाः जुयाया गौरव याये खनी। 'झीगु देय्' सीडीइ थुज्वःगु सन्देश दु।
नेपाल संवत्या झीसं राष्ट्रिय संवत् धकाः हनाच्वना। तर उकियात न्हूदँया न्ह्यइपुइ जक सीमित याना तये मजिल। उकी झी नेवाःत छधी जुयाः क्यनेमाःगु आग्रह नं थ्व सीडीइ दु।
देय् धइगु तःधं नं जुइफु चीधं नं। व तःधंगु खँ मखु। देशभक्त दकलय् न्हापां नुगःया हिनुली चुलि ब्याके माःगु दु। 'झीगु देय्' सीडीइ थज्याःगु आपालं म्येँ दुथ्याः।
म्येँ च्वमि, लय चिनामि नापं गायक रविन्द्र शाक्यं थज्याःगु हे जागरण म्येँत दुथ्याकाः थ्व सीडी पिथनादीगु खः। सीडीइ मुक्क न्हय्पु म्येँ दु। स्वपु म्येँया लसय् मौलिक बाजं भरे यानातःगु दु। 'दँ दँ नेपाःमि' शीर्षकया छपु म्येँय् नेवाः संगीतया नांजाःपिं झिंखुम्ह गायकतय्गु सः दुसा 'झीगु देय् झीसं' म्येँय् रविन्द्र शाक्यं रकि धासुया साथ कयादीगु दु।
'दँ दँ नेपाःमि' व 'भिन्तुना दु भिन्तुना' न्हूदँया इलय् तसकं लोकंह्वाःगु म्येँ खः।
'झीगु देय्' सीडीया पिकाक टु ब्रदर्स खःसा बिट रिकर्डिङ्ग स्टुडियोय् रिकर्ड यानातःगु खः। सीडीया मू १२५ तका तयातःगु दु। एल्बमया लागिं रविन्द्र शाक्ययात भिंतुना !

More Stories Like this