लुँवहः लुटे यायेत हानं मेगु हत्या

स्वनिगःया सुरक्षा प्रवन्ध हानं स्यना वंगु संकेत वःगु दु। शुक्रवाः चान्हय् पूच्वया छगू लुँवहः पसलय् लुटे याः वःपिं लुटेरातय्सं लुटपाट जक मखु अन पाः च्वनीम्ह ज्यामियात तकं ल्हाःतुति चिनाः स्यानाः यखाया थकल। पूच्वया तबालागु सतकय् लाःगु पसलय् थज्याःगु घटना जुयाच्वनं नं अन नापसं हे च्वंगु प्रहरी चौकीं धाःसा वाः तकं मचाःगु तःधंगु हे विडम्बनाया खँ खः। थःगु चौकीया झ्यालं जक स्वःसां खने दुगु छेँय् जूगु अपराध तकं सीके मफुपिं नेपाःया प्रहरीतय्सं मेमेगु तःधंगु अपराधया छानबिन गय् यानाः यानाच्वन जुइ धकाः अथें नं अनुमान यायेफु। प्रहरी प्रति तना वनाच्वंगु जनताया विश्वासयात थ्व घटनां झन स्याना हे बीगु ज्या याःगु दु। लुँवहः व्यवसाय अथें नं संवेदनशील व्यापार खः। व्यवसायिक रुपं जक मखु सुरक्षाया दृष्टिकोणं नं थ्व तसकं जोखिमपूर्ण जू। लुँवहः व्यवसायीतय्त थुकथं हत्या हे यानाः लुटपाट याःगु थ्व न्हापांगु घटना मखु। थ्व स्वयां न्ह्यः नं थीथी थासय् तःम्हमछि लुँवहः व्यवसायीया हत्या जुइधुंकूगु दु। तर प्रहरीं न हत्यारा लुइके फुगु दु न उमिसं लुटे याना यंकूगु तिसा हे। आःया पालय् नं प्रहरीपाखें व्यवसायीतय्सं आश्वासन बाहेक न्याय काये खनी धइगु आशा म्हो हे जक दु। नेपाःया प्रहरी न्हियान्हिथं हे निकम्मा जुया वनाच्वंगु आभास जनतां थुलि खाइक याये मालाच्वन कि आः गनं अपराध जूसां नं प्रहरीयात जानकारी बीगु आवश्यक मतायेधुंकल। प्रहरी धाथें जनता प्रति उत्तरदायी खःसा थ्व विभत्स हत्याकाण्डय् हत्यारायात तुरुन्त ज्वनाः कारवाही यायेमाः अले सरकारं पीडित परिवारयात माःगु क्षतिपूर्ति उपलब्ध यायेमाः।

More Stories Like this