केन्द्रीय मानन्धर संघया तःमुँज्या

येँ(सन्ध्या टाइम्स)/केन्द्रीय मानन्धर संघय् सभापति भाजु न्हुच्छे बहादुर मानन्धर हाकनं छक्वः निदँया निंतिं सभापति निर्वाचित जुयादीगु दु। म्हीगः थनया शान्ति निकुञ्ज माविइ जूगु संघया नीनिक्वःगु तःमुँज्यां वय्कःयात हानं छगू पदावधिया लागिं नायः कथं सर्वसम्मतं निर्वाचित याःगु खः।
तःमुँज्यां वय्कः मोहनकृष्ण मानन्धर, बद्रीनारायण मानन्धर, प्रकाश बहादुर मानन्धर, देवदास मानन्धर, मीन बहादुर मानन्धर, गजेन्द्र मानन्धर, गोपाल मानन्धर, सन्देश मानन्धर, भाइराजा मानन्धर, गणेश बहादुर मानन्धर, रघुवरभक्त मानन्धर व गंगा बहादुर मानन्धरपिंत नं मू दुजः कथं निर्विरोध ल्यःगु खः।
निगू चरणय् जूगु उगु ज्याझ्वःया न्हापांगु चरणय् मूपाहां देय् थकालि चौथिनारायण मानन्धरं ज्याझ्वःया उलेज्या यानादीगु खः। अथे हे ज्याझ्वलय् देवदास मानन्धरं च्वयादीगु मानन्धरतय्गु जनसंख्या सम्बन्धी 'मानन्धर धलः सफू' या उलेज्या नं जूगु खः। उगु हे ज्याझ्वलय् स्यांजाया क्याक्मी मानन्धर संघं केन्द्रीय मानन्धर संघयात झिंन्याद्वः तका दां लःल्हाःगु खः।
ज्याझ्वलय् दांभरि बद्रीनारायण मानन्धरं आर्थिक प्रतिवेदन व छ्यांज्ये प्रेम साय्मिं वार्षिक प्रतिवेदन न्ह्यब्वयादीगु खः।
संघया नायः न्हुच्छे बहादुर मानन्धरया सभापतित्वय् न्ह्याःगु उगु ज्याझ्वलय् दुजः रघुवरभक्त मानन्धरं लसकुस यानादीगु खः।
ज्याझ्वःया झ्वलय् थुगुसी न्हापांखुसी मिसापिंत नं खिं थाकाः प्रस्तुत याकेगु ज्या जूगु खः। थ्व स्वयां न्ह्यः मिस्तय्सं खिं थाये मजिउ धइगु मान्यता दुगु खः। उगु ज्याझ्वलय् न्हापांखुसी मय्जुपिं मनिका, प्रतिमा, युरी, अञ्जु व प्रतिभा मानन्धरपिंसं खिं थानाः क्यनादीगु खः। उकी गुरु दिपक मानन्धर नापं उदेन न्हूसाय्मिं ताः व हरिबाबु मानन्धरं बबू थानाः साथ बिउगु खः। अथे हे ज्याझ्वलय् क्वंचाखिं, मादल, पछिमा, धिमे, बय् आदि थानाः क्यनेगु नापं चचा प्याखं नं न्ह्यब्वःगु खः।