नेवाः एकता दिवस हनेत नेवाः जातीय खलः पुचःलिसे सहलह

येँ (सन्ध्या टाइम्स)/नेवाः स्वायत्त राज्य मंकाः संघर्ष समितिं थनया क्षेत्रपाटी पार्टी प्यालेसय् थीथी जातीय संघसंस्थालिसे सहलह ज्याझ्वः यात। थ्वहे वइगु पोहेलाथ्व नवमि (पुस १८ गते) थनया चकंदबू (खुल्ला मञ्च)य् यायेत्यंगु नेवाः एकता दिवस ताःलाकेगु निंतिं जूगु सहलह ज्याझ्वलय् संघर्ष समितिया सचिवालय कजि मल्ल के. सुन्दरं नेवाः एकता दिवस थ्व पालय् बिस्कं कथं हनेमाःगु लिसें नेवाः शक्ति प्रदर्शन यानाः हे नेवाः प्रदेश सुनिश्चित यायेमाःगु विचाः प्वंकादिल।
संघर्ष समितिया नायः कृष्ण बहादुर घःजुया सभापतित्वय् समितिया दुजः सुजीव वज्राचार्यं लसकुस यासें न्ह्याकूगु उगु ज्याझ्वलय् नेवाः राष्ट्रिय मुक्ति मोर्चा, नेपाः लोकतान्त्रिक नेवाः दबू, ज्यापु समाज, ज्यापु महागुथि, नेवाः जागरण मञ्च तोखा, नेवाः जागरण मञ्च बुंग, कपाली समाज, तण्डुकार समाज, बज्राचार्य समन्वय समिति, नेवाः स्यनामि गुथि, राजकर्णिकार समाज, बलामी समाज, चित्रकार समाजयालिसें थीथी जातीय प्रतिनिधिपिसं थःथःगु नुगःखँ तयादीगु खःसा नेवाः एकता दिवस थुगुसी तःजिक हनेगु नितिं माःकथंया तयारी ज्या न्ह्याकेगु जानकारी बिउगु खः।
अथेहे उगु ज्याझ्वलं आर्थिक तदर्थ समिति नं नीस्वंगु दु। उगु समितिइ लक्ष्मीदास मानन्धर, डा. महेशमान श्रेष्ठ, डा. पुष्पराज राजकर्णिकार, राजेश शाक्य, विजय बज्राचार्य, उमेश स्थापित च्वनादीगु दु।
ज्याझ्वलय् संघर्ष समितिया सल्लाहकारपिं राजेन्द्र श्रेष्ठ, प्रा. माणिकलाल श्रेष्ठपिसं थःगु नुगःखँ तयादीगु खः। ज्याझ्वः संघर्ष समितिया दुजः अनुप सिंह सुवालं न्ह्याकादीगु खः।