'अख्तियारं मन्त्रीतय्त छानबिन या'
येँ(सन्ध्या टाइम्स)/नेपाली कांग्रेसया नेतृ सुजात कोइरालां डा. बाबुराम भट्टराईया नेतृत्वय् दुगु वर्तमान सरकार अप्वः मन्त्री व मन्त्रालय दुने भ्रष्टाचार जुयाच्वंगुलिं अख्तियार दुरुपयोग अनुसन्धान आयोगं छानविन यायेमाः धयादीगु दु। मन्त्रीतय्सं हे न्ह्यःनेलाःथे ध्यबा इना बिउगुलिं इमित छानविन यायेमाःगु माग वय्कलं यानादीगु खः। विराटनगरय् थौं संचारकर्मीलिसे खँल्हासें वय्कलं धयादिल, 'अख्तियार छु स्वयाच्वंगु खः? वं थःगु ज्या यायेमाल। मन्त्रीतय्सं अनैतिक कालबिल यानाच्वंगु अवस्थाय् अख्तियार सुम्क च्वने मजिउ।'
अख्तियार व सर्वोच्च अदालतय् मुद्दा जुयाच्वंपिं मन्त्रीत प्यखेरं बदनाम जूपिं खः धासें इमिसं ब्रम्हलुट यानाच्वंगु अवस्थाय् सुनां नं न्वमवासे च्वनेगु धइगु षडयन्त्र खः धकाः नं वय्कलं धयादिल।
