सरकारय् हानं देउवाया दावी
येँ(सन्ध्या टाइम्स)/नेपाली कांग्रेसया बरिष्ठ नेता शेरबहादुर देउवां आः दयेकीगु सहमतीय सरकारया नेतृत्व थम्हं यायेगु दावी यानादीगु दु। प्रेस युनियन बैतडीं थौं याःगु पत्रकार सम्मेलनय् न्ववासें वय्कलं धयादिल 'सहमतीय सरकारया नेतृत्व जिं याये।' सरकारया नेतृत्व यायेगु निंतिं पार्टीं निर्णय यायेधुंकल धासें वय्कलं धयादिल 'केन्द्रीय समितिं जितः उम्मेदवार दयेकेगु निर्णय यायेधुंकूगु दु, दलतय्गु दथुइ सहमतिया वातावरण खने दुगुलिं आःया प्रधानमन्त्री जि हे जुइ।' शान्ति प्रक्रिया पूरा मजुइकं संविधान निर्माण जुइ मखु धासें वय्कलं सर्वोच्च अदालतं लिपांगु इलय् संविधानसभाया म्याद बारे फैसला यायेधुंकूगुलिं जेठ दुने संविधान घोषणा हे यायेमाः धकाः नं धयादिल।
