मदुपिं लडाकु बारे सरकारं लिसः बीमाः

येँ(सन्ध्या टाइम्स)/नेपाली कांग्रेसया महामन्त्री कृष्ण सिटौलां माओवादी लडाकु सम्पर्कय् मदुसां शिविरपाखें तलब कयाच्वंपिनिगु बारे सरकार व अनुगमनय् च्वनाच्वंपिंसं लिसः बीमाः धयादीगु दु।
थौं भरतपुरय् जूगु पत्रकार सम्मेलनय् न्ववासें नेता सिटौलां अथे धयादीगु खः। वय्कलं शिविरं लडाकुत गन वन, ध्यबा सुनां कयाच्वन थुकिया लिसः सरकार व अनुगमनय् च्वंपिंसं बीमाः धयादीगु खः।
शिविरया गतिविधि बारे न्हापांनिसें आलोचना जुयाच्वंगु खःसा माओवादीं उकियात त्वपुइगु याना वयाच्वंगु खःसा आः वयाः शिविरया वास्तविकता बुलुहुँ पिहां वःगु दु धयादिल।
वय्कलं मंसीर २९ गते तक थ्व सरकारं शान्ति प्रक्रियाया मुलभूत ज्या क्वचायेकेगु डेटलाईन काःगु जूगुलिं अनं लिपा कांग्रेसया नेतृत्वय् सरकार गठन जुइगु दावी यानादिल। सिटौलां शान्ति प्रक्रिया पूवंगु १५ न्हुया दुने हे संविधान तयार जुइगु दावी नं यानादिल।
शान्ति प्रक्रिया ताःलाकेत लडाकु व्यवस्थापन, हतियार व्यवस्थापन, जग्गा लित बीगु, वाइसिएल विघटन, अवैधानिक गाडी चले यायेगु थेज्याःगु विषयय् माओवादी नेतातलिसे सहलह जुयाच्वंगु जानकारी बियादिसें वय्कलं दलीय सहमति व छुं छुं विषययात कयाः माओवादी स्वयं हे पूरा यायेमाःगु आधार निर्माण जुइधुंकल धकाः नं धयादिल।