हत्याया विरोधय् यल ठप्प

यल(सन्ध्या टाइम्स)/यलया लुँकःमि जुजुकाजी बज्राचार्ययात स्याना बिउगु विरोधय् थौं यलया उद्यमि व्यवसायीतय्सं मंकाः कथं यल जिल्ला बन्द याःगुलिं जनजीवन प्रभावित जूगु दु।
बज्राचार्यया हत्यारायात ज्वनाः कारवाही यायेमाःगु, उद्यमि व्यवसायीतय्गु नितिं सुरक्षाया व्यवस्था यायेमाःगु, मदुम्ह बज्राचार्यया परिवारयात क्षतिपूर्ति बीमाःगु माग यासें थ्व बन्द याःगु खः।
थौं सुथंनिसें यलया उद्यमि, व्यापारी नापं स्थानीयवासीत थाय् थासय् मुनाः बन्दया नितिं प्रदर्शन याःगु खः।
बन्दया कारणं प्रेस, अस्पताल, एम्बुलेन्स, प्रहरी नापं विदेशी नियोगया गाडी जक चले जुयाच्वंगु दुसा सार्वजनिक नापं निजी गाडी तकं ठप्प जूगु दु।
अथे हे यल जिल्ला दुनेया बजाः तकं ठप्प जूगु दु। ललितपुर उद्योग वाणिज्य संघया इनापय् थ्व बन्द जुयाच्वंगु खः। उगु बन्द ज्याझ्वःयात नेपाल सुनचाँदी व्यवसायी संघ यल, खुद्रा व्यापार संघ, धातु ब्यापार संघ, खाद्य व्यापार संघ, तयारी पोशाक, निर्माण व्यवसायी, कपडा व्यापार संघ, घरेलु तथा साना उद्योग संघ, इँटा भट्टा संघ, निर्माण सामग्री व्यापार संघ, सुपर मार्केट, तामा पित्तल संघ नापं थीथी व्यावसायिक संघ संगठनं समर्थन याःगु दु।
थौं सुथय् प्रदर्शनकारीतय्सं यलया मंगलय् मुनाः जुलुस पिकाःगु खः। जुलुस थाय्थासय् चाःहिलाच्वंगु दु। अथे हे यलय् वनीगु मू मू नाकाय् प्रदर्शनकारीतय्सं बन्द यानाच्वंगु दु। अन प्रदर्शनकारीत च्वनाच्वंगुलिं मोटरसाइकल तकं चले जुयाच्वंगु मदु।
न्हिनय् तक शान्तिपूर्ण रुपं बन्द जुयाच्वंगु दु। प्रदर्शनकारीतय्सं छुं नं कथंया सवारी साधन व पसः तोडफोड मयासे बन्द यायेत इनाप यायां वनाच्वंगु दु। बन्दया झ्वलय् छुं नं अप्रिय घटना जुइ धकाः थाय्थासय् प्रहरीत नं परिचालन यानातःगु दु। यलया बन्दं यानाः येँय् धाःसा थाय्थासय् ट्राफिक जामया समस्या जूगु दु। मनूत खुसि सिथ व रिंगरोडपाखें वये-वने यानाच्वंगु खनेदु।
उगु घटनायात कयाः म्हिगः नेपाल सुनचाँदी व्यवसायी संघं लुँवहः पसः बन्द यासें गृहमन्त्रीयात ज्ञापन पौ नं बिउगु खः।