हाकुगु न्हि - जेठ १८

नेपाःया भाषिक ख्यलय् जूगु अन्यायपूर्ण फौसलाया नां खः जेठ १८ । थ्वहे न्हियात नेवाःत लगायत सकल भाषिक कार्यकर्तातय्सं धया वयाच्वंगु खः - हाकुगु न्हि ।

येँय् महानगरपालिकाया २०५४ साउन १० या बोर्ड मुंज्याया पाखें झीगु मांभाय् नेपालभाषायात नं महानगरपालिकाया ज्याखँय् छय्लाबुलाया भाय् धकाः आधिकारिक मान्यता ब्यूगुयात कयाः छथ्वः साम्प्रदायीक पुचलं सर्वोच्च अदालतय् ब्यूगु मुद्दाय् २०५४ चैत्र ६ कुन्हु न्यायाधीश हरिश्चन्द्र उपाध्यायया याकःचिया इजलासं थुगु मुद्दायात अन्तिम किनारा मजूतले महानगर पालिकाय् नेपालभाषायात आधिकारिक कथं छय्लेगु छय्येकेगु ज्या मयायेत व मयाकेत अन्यायपूर्वक अन्तरिम आदेश ब्यूगु खः । लिपा जेठ १८ २०५६ कुन्हु सर्वोच्च अदालतं नेपालभाषा व मैथली भाषायात स्थानीय निकाय दुने आधिकारिक ल्याखँ छय्लेमदु छय्येके मदु धकाः रीट जारी याःगु खः । थ्वहे फैसलाया विरुद्ध नेवाः लगायत भाषिक ह्यःमिपिंसं जेठ १८ यात हाकुगु न्हि कथं हनावयाच्वंगु खः ।

येँ मनपां नेवाः भाय्यात नं छ्यलाबुलाया गुगु मान्यता बिउगु खः उकियात सर्वोच्च अदालतं खारेज याना बिउगु थ्व न्हियात कयाः हाकुगु न्हि कथं कयाःवयाच्वंगु खः । तर थौं ई हिलेधुंकूगु दु । भाषिक व संस्कृतिक माग ज्वना आन्दोलन यानाच्वंपिं नेवाःत थौं नेवाः लागाय् थःपिंसं हे शासन याये दयेमाः धइगु माग ज्वना सतकय् कुहांवयेधुंकूगु दु । नेवाःतय् ऐतिहासिक लागाः नेपालमण्डल यात नेवाः स्वायत्त राज्य धकाः घोषणा यायेमाः धइगु माग ज्वनाः आन्दोलन न्ह्याके धुंकूगु दु ।

सर्वोच्च अदालतं ब्यूगु उगु अन्यायापूर्ण फैसलाया न्हि १८ जेठ २०५६ निसें थौं १८ जेठ २०६६ तक वयेधुंकाः न्हापाया संविधान खारेज जुया अन्तरिम संविधान लागू जुयाः आः संविधानसभा मार्फत न्हूगु संविधान च्वयेगु ज्या जुयाच्वंगु दु । ०५६ सालय् सर्वोच्चं ब्यूगु आदेश खारेज जुइधुंकूगु दु तर नेवाःतय् उकुन्हु लाःगु घाः निरन्तर भाषा, संस्कृति व जातिय रुपं विभेद व बहिष्कृत यायेगु ज्या जुया हे च्वंगुलिं अझ लंगु मदुनि ।

थ्वेहे कारणं सर्वोच्चं ब्यूगु फैसलां नेवाःतय् नुगलय् लाकूगु घाःया झिदँ लिपा नेवाःत आः झीगु लागाय् झीत सुयां थ्वया-वया धकाः धाये दइमखु, झीगु लागाय् झीसं झीगु भाय् बिना निषेध छ्यलेदेयेमाः, झीगु भाषं ब्वने देयेमाः, झीगु संस्कृतिया सहि रुपं हने दयेमाः व झीगु लागाय् झीसं हे शासन याये दयेमाःगु माग ज्वन नेवाःत सतकय् कुहांवःगु दु ।

सर्वोच्चं ब्यूगु फैसला भाषिक अधिकारया मुद्दायात कयाः ३० भदौ २०५६य् नेवाःतय्सं स्वनिगः बन्द याःगु खः । थौं भाषिक, संस्कृतिक व राजनीतिक अधिकार नापं स्वशासनया माग सहित नेपालमण्डल बन्दया घोषणा याःगु खः ।

राज्य सत्तां निरन्तर यानाच्वंगु दमनया फल स्वरुप अज्याःगु निकाय तक झीगु सः थ्यंकेत याःगु विरोधया दसू खः - नेपालमण्डल बन्द ।

More Stories Like this