श्रद्धेय गुरु सत्वतारा बज्राचार्य

सिद्धिरत्न बज्राचार्य

लुमन्ति

श्रद्धेय गुरु (स्थविर) सत्वतारा बज्राचार्ययात दुनुगलंनिसें छपासः श्रद्धाञ्जली देछाये। वय्कः मदुगु निदँ तिथिया झ्वलय् थ्व श्रद्धाञ्जली देछानागु जुल ।

न्हापां जिगु मनय् लू कथं श्रद्धेय गुरु सत्वतारा वज्र बज्राचार्यया भावनात्मक खँग्वः प्वंके। सत्वया अर्थ 'सत्य' खः। थुकियात महायान बज्रयान बौद्ध धर्म कथं धायेगु खःसा सत्य सिबे थ्व संसारय् मेगु छुं मदु। थुकियात परमार्थ सत्य नं धायेगु याः। अथे हे ताराया अर्थ वायु, फय्या उत्पत्ति जुइधुंकाः अग्नी ब्वलनाः मि च्यात, मि च्यानाः हे रुप वेदनां संज्ञा आदि उत्पन्न जुल। अले थ्व यः थ्व मयः, बांलाः-बांमलाः, नवः-नस्वाः, तःधिकः-चीधिकः, भिं-मभिं धइगु नं उत्पन्न जुल। अले थुकिया लिसें दुःख-सुख, पाप-धर्म, याये जिउ-याये मजिउ धइगु भावना नं ब्वलन। थःगु भावना तरय् याये फुम्ह धइम्ह हे तारा तारणी माता खः। यदि थन तारा, फय् मदुगु जूसा मि नं ग्वाइ मखु। अले थ्व कालचक्र धइगु नं दइ मखुगु जुइ।
थुकथं हे बज्रया अर्थ हद प्राणिधान सहन शक्ति अठोट खः। थथे सत्व नांयाके थुगु बज्रया अर्थ कथं जिं थथे याये धइगु प्रतिधान संकल्प दुगु कारणं थःगु जीवनजःछि धर्म कर्म यानाः महायान बज्रयान बौद्ध धर्मया सेवा, सहयोग याये फयाः थौंतकं सत्वताराया अर्थ लुमंकाच्वने खन। सत्वताराया मुख्य उद्देश्ययात सकसिनं थुइकेत हःपाः नं दत ।

बज्राचार्य:- बज्र आचार्य बज्राचार्य मनुष्य जन्म कयाः खालि जातय् जक बज्राचार्य धायेकेगु मखुसें बज्राचार्यया कुलय् जन्म जुयागु कारणं बज्राचार्यं यायेमाःगु धर्म, कर्म, शिक्षा, दीक्षा, योग आदिया ज्ञान महाज्ञानयात थुइकाः प्रज्ञा ज्ञान प्राप्त याये फइगु हे बज्राचार्यया मूल अर्थ खः।
बज्र धइगु प्रणिधान, प्रतिज्ञा प्रज्ञा खःसा घण्ट धइगु उपाय, आलि व कालि cause and effect खः। थुकियात थुइकाः थःगु जीवन चक्रयात न्ह्याके फइ धकाः थुइके फुम्ह हे धाथेंया बज्राचार्य खः। कारण, वं उपाय यानाः हे थन संसारया सृष्टि जुयाः सकतां दत अले मदया नं च्वन।
थुगु प्रकारं छम्ह पूर्ण बज्राचार्ययाके दयेमाःगु गुणं सम्पन्न जूम्ह जुयाः श्रद्धेय गुरु सत्वतारा बज्राचार्यया नामं प्रख्यात जुल। मखुसा थन गुलि वल गुलि वन, सुनानं लुमंके फयाच्वंगु मदु। मनुखं मनूयात लुमंकेगु धइगु हे वया गुणं व वं यानावंगु शुभ कर्मया फलं खः। समता भाव वा मैत्रीय भावया दसि खः। उकिं वय्कः केवल व्यक्तिइ जक सीमित मखु। रत्नकीर्ति महाविहारया थःगु छगू परिवारय् जक नं सीमित मखु । बरु सम्पूर्ण समाजय् व्याप्त जुइ फत। उकिं सकसिनं माःमाः कथं लुमंकेगु खःसा वय्कः सकतां हे खः। मखंबहाःया याकः चक्रेश्वर नं खः ।

वय्कलं थःगु जीवनकालय् थम्हं कयागु, सयेकागु ज्ञान थः सकल शिष्य, इष्ट मित्र, जय्माःपिंत बियाः "सर्व प्रकारं जगतो हिताय (बुद्धो भवेगम जगतो हिताय)" या ज्या यानादीगु दु। उकिं वय्कः छम्ह सकसिगुं मनय् च्वने फुम्ह मञ्जु बज्र नं खः ।

वय्कलं थःगु जीवनकालय् महायान बज्रयान बौद्ध धर्म म्वाका तयेत थः याकःचां जक मखुसे सकल गुरु बज्राचार्यपिंत पुजाआजा, दान आदानप्रदान, चर्या आदि स्यनेकने यायेत थःगु हे छेँय् छगू पाठशाला चायेकादीगु खः। लिसें बौद्ध सोगत्र गुरुमण्डल आदि थीथी सफू छापे याकाः धर्म दान नं यानादीगु दु। अझ थः छेँजःयाके नं श्रद्धा भाव ब्वलंकाः आपालं योगदान बियादीम्ह महायान बज्रयान बौद्ध धर्मया सकल गुरुवर्ग, मित्र, शिष्य व जय्माःपिंत सयेके सीकेत हःपाः बियाः थम्हं यायेमाःगु धाथेंया धर्म कर्म यानादीगु सुनानं ल्वःमंके फइ मखु। अले वय्कलं यानादीगु धर्म व कर्मयात ल्वःमंके नं मजिउ।
गन प्रेम मैत्री भाव दइ, अन सुख दइ, शान्ति दइ। गन शान्ति दइ, अन श्रद्धा नं दइ। अले गन शान्ति दइ अन प्रज्ञा ज्ञान नं दइ, अन हे स्वर्गया सुख नं दइ। उकिं सीधुंकाः दइगु स्वर्ग स्वयां थन हे स्वर्गया सुख भोग याये दइगु उत्तम खः ।

वास्तवय् धायेगु खःसा मानव जन्म कयाः थनं सिना वनेबलय् झीसं छुं नं यंके दइमखु। न झी थन वयाबलय् हे छुं ज्वना वयागु खः। थ्व धर्ती च्वंत्तलय् झीके गुलि नं दइगु खः व झीसं थन हे त्वःता वनेमाः। थ्व संसार अनित्य खः, उकिं थन वःपिं फुक्क छन्हु थनं वने हे माः। थ्व संसारया शास्वत सत्य हे जुल। यदि थ्व संसारं वनेबलय् झीसं थःलिसे हे यंकेगु छुं दुसा व खः परमार्थ सत्य। गुकियात महायान बज्रयान बौद्ध धर्म कथं शुन्यता व करुणा धयातल। करुणा दुम्ह मनुखं शुन्यतायात खंके फइ। शुन्यता थूम्हेसिनं हे करुणायात नं थुयाच्वनी। थ्व हे अभिधर्म खः। थथे भाव थुइके फःसा जक प्रज्ञा (प्रज्ञा ज्ञान) प्रज्ञापारमिताया दर्शन खंके वा थुइके फइ ।

अथे जूगुलिं सत्वताराजुं थःगु जीवनकालय् गुलि नं यायेमाःगु सत्य कर्म यानादिल उकिया प्रभावं वय्कलयात निर्वाण प्राप्ति लायेमा। सुखावति भुवनय् बास लायेमा। अभिताभ तथागतया कुलय् बास लायेमा धइगु कामना यासें श्रद्धेय गुरु सत्वतारा बज्र बज्राचार्यया निदँया तिथिस श्रद्धाञ्जलीया छपासः स्वां देछायाच्वना ।

More Stories Like this