कार्यतालिकाया पूर्ण सम्मान याये

संविधान च्वयेगु लागिं थपे जूगु खुलाया दुने हे न्हूगु संविधान तयार यायेगु धकाः संवैधानिक समितिं न्हूगु कार्यतालिका तयार याःगु दु। कार्यतालिका कथं आः २०६९ सालया जेष्ठ ८ निसें १४ गते तकया दुने न्हूगु संविधान जारी हे याये फइ कथं ज्या यायेगु ज्याझ्वः दयेकूगु दु। उकिया निंतिं गबले गबले छु छु ज्या यायेगु धकाः ज्या व तिथि समेत तयार याना तःगु दु। खतुं थज्याःगु कार्यतालिका थ्व स्वयां न्ह्यः नं दयेकेधुंकूगु खः। तर दलतय्सं संविधान च्वयेगु ज्याय् अलमल याना बिउगु कारणं कार्यतालिका संशोधन यायां यायां अन्तय् उकियात खारेज हे यायेमाःगु तक अवस्था थ्यन। राजनीतिक दलतय्सं संविधान च्वयेगु सिबें नं सरकार गठनया ज्याय् अप्वः ध्यान बिउगु कारणं संविधानसभां ताः ई ज्या हे याये मखन। उकिया हे लिच्वः कथं मेहनतपूर्वक दयेकेधुंकूगु कार्यातालिका कथं छुं हे ज्या न्ह्याः वने मखन ।

आः नं कार्यतालिका पूर्ण रुपं लागू याये फइ धकाः ग्यारेन्टी काये फुगु अवस्था मदुनि। संविधानसभाया म्याद खुला थपे जुइवं हे आः राष्ट्रिय सरकार सुयागु नेतृत्वय् गठन यायेगु धइगु विवाद सुरु जुइधुंकूगु दु। थ्व विवादं हानं नं संविधान लेखनयात ध्याकुनय् लाकीगु सम्भावना दु गुकिं आः हानं छक्वः दयेके धुंकूगु कार्यतालिका बेकार साबित जुइफु। तर न्हापाया गल्तीपाखें शिक्षा कयाः राजनीतिक दलतय्सं आःया कार्यतालिकायात पूर्ण रुपं 'फलो' याना वनेमाः। कार्यतालिकायात प्रधान माने यानाः ज्या यात धाःसा मेमेगु विवादयात गौण याना छ्वये फइ। कार्यतालिकायात सम्मान यायेगु निश्चय मयाःतले हानं नं संविधान वइगु ग्यारेन्टी मदुनि ।

More Stories Like this