थाय्मरु त्वाःछेँ मनपायात मबीगु

येँ (सन्ध्या टाइम्स)/येँ महानगरपालिका वडा नं. २८ थाय्मरुया सार्वजनिक भवन त्वाःछेँयात सम्बन्धित वडाया पदाधिकारी नापं स्थानीय राजनीतिक व्यक्तित्व मिले जुयाः महानगरपालिकाया स्वामित्वय् यंकेगु नितिं जूगु कुतःयात कयाः म्हिगः थाय्मरु बहालय् याःगु वडा स्तरीय सार्वजिनक भेलां छगू हे मतं उगु त्वाःछेँ मनपायात मबीगु धकाः प्रतिबद्धता प्वंकूगु दु ।

पुलांपिं वडाध्यक्षपिं, वडा कर्मचारी, एनेकपा(माओवादी), नेकपा (एमाले) नेपाली कांग्रेस व जनशक्ति पार्टीया प्रतिनिधिपिंसं ब्वति काःगु उगु सार्वजनिक भेलाय् छगू राष्ट्रिय न्हि पतिइ 'पूर्वकार्यकारी राईद्वारा वडा भवन क्लबलाई सुम्पने सहमति' धकाः छ्यं छुनाः पिदंगु बुखँय् २८ वडाया सार्वजनिक सम्पत्ति त्वाःछेँयात महानगरपालिकाया स्वामित्व दुगु धकाः पिदंगु बुखँ आधारहीन, असत्य व भ्रामक जूगु धासें दक्वसिनं खण्डन याःगु खः। लिसें बुखँय् स्रोत व्यक्ति कथं न्ह्यथनातःम्ह पुलांम्ह वडा अध्यक्ष सुभानकुमार श्रेष्ठ व वडासचिव प्रकाश रंजितं उगु न्हि पौया सम्वाददातालिसे थःपिंसं उकथंया प्रतिक्रिया मबियागु खँ नं सार्र्वजनिक यानादीगु खः ।

सार्वजनिक भेलाय् शहीद शुक्र क्लबया अध्यक्ष राजेशप्रसाद श्रेष्ठं त्वाःछें कःघानातःगु जग्गाय् वडाया सार्वजनिक हकहितया लागि सामुदायिक भवन, स्वास्थ्य चौकी, वडा ज्याकू व क्लब ज्याकूलिसें एकीकृत भवन दयेकेगु ताःतयाः महानगरपालिका व क्लबया दथुइ स्वंगू चरणय् सहकार्यया सम्झौता याःगु जूसां सम्बन्धित न्हि पतिं उगु तथ्ययात हीकाः महानगरपालिकाया जग्गा क्लबयात मीगु व लःल्हायेगु त्यंगु धकाः भ्रामक समाचार प्रकाशन याःगु सम्बन्धय् स्पष्ट याःगु खः ।

२८ वडा समिति त्वाःछेँ, सञ्चालक समितिया सचिव मल्ल के. सुन्दरं उपलब्ध नापी गोश्वराया निर्णय, उपलब्ध भ्वं, नापी फिल्डबुक उतार व तत्कालीन नगरपालिकानापं जूगु पत्राचार न्ह्यब्वसें जनताया आर्थिक अनुदान व ग्वाहालिं धस्वाना च्वंगु भवनया सम्बन्धय् नगरपालिकाया गुगुं योगदान वा भूमिका तकं मदुगु, मात्र वडाया ज्याकू सञ्चालनार्थ छकू क्वथा सितिकं बियातःगु व वंगु स्वंगू दशक स्वयां न्ह्यवंनिसें थुकीया मर्मत सम्भार, हेरचाह, संरक्षण व भोग चलन त्वाःछेँ संचालक समितिं यानाच्वंगु यथार्थ प्रस्तुत यासें थुकीया स्वामित्व २८ वडाया जनतायाके दु धयादिल ।

स्थानीय जेष्ठ नागरिक श्री हेराकाजी स्थापितया अध्यक्षताय् जूगु सार्वजनिक मेलाय् पूर्व वडाध्यक्ष हसना शाक्यं नं त्वाःछेँ दयेकेगु ज्या थःगु कार्यकालय् जनताया ग्वाहालिं हे जूगु खँ कनादीगु खः ।