कर्पिनि जग्गा पुराणय् दान

ख्वप(सन्ध्या टाइम्स)/थनया खौमास्थित श्री पद्म मावि लागाय् न्ह्यानाच्वंगु श्रीमद्भागवत महापुराणय् छम्ह मनुखं थःगु नामय् यानातःगु सरकारी जग्गा समेत दान बीवं पुराण ज्याझ्वलय् हे कचवं पिहां वःगु दु। ख्वपया दधिकोट गाविस वडा ९ या २२ रोपनी ४ आना जंगलयात स्थानीय नरेन्द्रराज पाण्डें मालपोत व डिभिजनया वनया कर्मचारीत जानाः थःगु नामय् यानाः कयातःगु जुयाच्वन। उम्ह मनुखं थ्व जग्गा पुराण कार्यक्रमय् दान याःगु खँ सीवं स्थानीय मनूतय्सं पुराण ज्याझ्वलय् हे घेराउ याना बिल। घेराउ लिपा जग्गा दान बिउम्ह नरेन्द्रराज पाण्डे ला अनं तुं गायब जुल। जग्गा दान काःम्ह पुराण वाचक नारायणराज शर्मां दान वःगु जग्गाय् स्थानीय जनताया स्वीकृति दुसा जक लक्ष्मीनारायण देगः दनेगु जुइ धकाः सम्झे यात।