हत्याया विरोधय् लुँवहः पसः बन्द
येँ (सन्ध्या टाइम्स)/पूच्वया गुण ज्यासः पसःया कर्मचारी जुजुकाजी बज्राचार्ययात स्याना बिउगु विरोधय् थौं नेपाल सुनचाँदी व्यवसायी संघं स्वनिगःया लुँवहः पसः बन्द याःगु दु। पसलय् खू वःपिं लुटेरातय्सं वंगु शुक्रवाः बहनी बज्राचार्ययात ल्हाःतुति चिनाः स्याना बिउगु खः ।
सुनचाँदी व्यवसायी संघया नायः तेजरत्न शाक्यं लुँवहः व्यापारीतय्गु सुरक्षा नापं हत्यारायात ज्वनाः कारवाही यायेमाःगु माग यासें थौं पसः बन्द यानागु खँ कनादिल। थ्वहे दथुइ व्यवसायी संघया यल जिल्ला शाखां उगु घटनाया विरोधय् थौं सुथय् पूच्वं छगू विरोध र्याली नं पिकाःगु दु। उगु विरोध र्याली यलया थीथी लागाय् चाःहिला क्वचायेकूगु खः ।
अथे हे थौं नेपाल सुनचाँदी व्यवसायी संघं लुँवहः व्यापारीतय्गु सुरक्षा यायेमाःगु नापं दोषीयात ज्वनाः कारवाही यायेमाःगु माग यासें गृहमन्त्रीयात ज्ञापनपौ नं लःल्हाःगु दु ।
थ्वहे दथुइ नेवाः जागरण मञ्चपाखें संयोजक सुजीव बज्राचार्यं छगू विज्ञप्ति पिथनाः उगु घटनायात घोर भर्त्सना याःगु दु। नापं मञ्चं स्वनिगलय् सुरक्षाया माग नं याःगु दु। अथे हे नेवाः प्रेस दबूपाखें मू छ्यांज्ये विनोद रंजितं नं छगू वक्तव्य पिकयाः थ्व घटनां देशय् शान्ति सुरक्षा मदया वनाच्वंगु खँ पुष्टि जूगु दु धासें घटनाया न्यायिक छानबिन यायेत माग याःगु दु ।
उगु पसलय् ज्या याइम्ह वज्राचार्ययात लुटेरातय्सं स्यानाः झ्यालय् यखाया थकूगु खः ।
