मेम्ह सचिवपाखें राजीनामा
येँ (सन्ध्या टाइम्स)/अनिवार्य अवकास कायेगु लत्या जक ल्यं दनिगु इलय् थःत अपमानपूर्वक सरुवा यात धासें शिक्षा सचिव शंकर पाण्डें राजीनामा बियादीगु दु। थःत मययेक सरुवा याःगु खँय् असन्तुष्टी प्वंकुसें वय्कलं थौं राजीनामा बियादीगु खः ।
वंगु मंसीर १ गतेया मन्त्रिपरिषद् बैठकं पाण्डेयात शिक्षा मन्त्रालयं सरुवा यानाः प्रधानमन्त्री तथा मन्त्रिपरिषद् कार्यालयय् छ्वया बिउगु खः। उकी हे असन्तुष्टी क्यँसें वय्कलं थौं पदं राजीनामा बियादीगु खः। राजीनामा पती धाःसा वय्कलं 'घरेलु कारणं' धइगु न्ह्यथनादीगु दु। राजीनामा च्वयाः वय्कलं मुख्य सचिव माधवप्रसाद घिमिरेयात लःल्हानादीगु दु ।
पाण्डे ५८ दँ सेवा अवधि पूरा यानाः वइगु पुष १९ गते अवकास कायेत्यंम्ह खः। अनिवार्य अवकास कायेगु दच्छि सिबें न्ह्यः इमिगु सहमति बिना सरुवा याये मदइगु स्पष्ट व्यवस्था निजामती ऐनय् दु तर सरकारं वय्कःयात पूर्व जानकारी मबिसे सरुवा याःगु खः। प्रधानमन्त्री नापं मन्त्रिपरिषद् कार्यालयया सचिव गोविन्द कुसुमं अनिवार्य अवकास कायेवं खाली जूगु उगु थासय् पाण्डेयात सरुवा यायेगु ज्या जूगु खँ धाःगु दु ।
थ्वहे दथुइ शिक्षा सचिव पाण्डेयात थौं हे मन्त्रालयया कर्मचारीतय्सं बिदाई ज्याझ्वः नं यायेत्यंगु दु।
छुं ई न्ह्यः जक सरकारी ज्या प्रति असन्तुष्टी प्वंकुसें तत्कालिन अर्थ सचिव रामेश्वर खनालं पदं राजीनामा बियादीगु खः ।
